И йикъара Эстониядин меркез Таллин шегьерда грекринни римлуйрин жуьреда кьуршахар кьунай дуьньядин кIвенкIвечивал къазанмишун патал кьиле фейи акъажунра чи ватандаш — Ахцегь райондай тир Анвар Аллагьяровани иштиракна. Финалдин акъажунра А.Аллагьяров Азербайжандин патай экъечIнавай Заур Алиевахъ галаз “гуьруьшмиш хьана”. ИкI, чи ватандашди 55 кг-дин заланвал авайбурун арада инанмишвилелди гъалибвал къазанмишна. Идакай “Лезги газетдиз” Ахцегь райондин администрациядин пресс-къуллугъди хабар гана.
РикIел хкин: алай йисан июлдин вацра Анвар Аллагьярова Испаниядин Понтеведра шегьерда Европадин кIвенкIвечивал патал кьиле фейи акъажунра 2-чка кьунай.
Спортдин рекье зурба агалкьун — дуьньядин кIвенкIвечивилин тIвар къазанмишун чи ватандашдиз Ахцегь райондин кьил Осман Абдулкеримова ва райондин депутатрин собранидин председатель Абдул-Керим Палчаева тебрикна.
«Лезги газет»
