Виликдай Ахцегь районда, гьуьлелай 1200 — 1450 метрдин кьакьанда, экIя хьанвай КIурукIунрин хуьруьн агьалийрин са пай алатай асирдин 50-йисара Хасавюрт райондин Къурушдал, амай пайни Кьурукалар ва Бамматюрт хуьрериз куьч хьанай. Гьа икI, тIебиатдин гуьрчег пипIерикай сад тир Мухулахах дередай ва кIамай инсанрин кIвач атIана…
Къенин макъала вичин ери-бине КIурукIунрин хуьряй тир бажарагълу спортсмен, азаддаказ кьуршахар кьунай 61 кг-дин заланвал авайбурун арада вичин устадвал къалурзавай Рамазан Ферзалиевакай я. Ам 1995-йисан 19-февралдиз Хасавюрт райондин Бамматюртда дидедиз хьана. Спортдал машгъул жез 12 йисалай виниз я. Р.Ферзалиева Хасавюртда стхаяр тир Ирбайхановрин тIварунихъ галай СДЮШОР-да тренерар — Олхозур Минтулаеван ва Ваха Ирбайханован гъилик спортдин сирер чирна.
Алатнавай йисара чи ватандашди еке агалкьунар къазанмишна. ИкI, ада Владикавказ шегьерда “Аланы” тIвар алаз кьиле фейи международный турнирда гъалибвал, континентрин уртах Кубок (Умаханован экуь къаматдиз бахшна) патал акъажунра 3-чка, Калмыкиядин меркез Элистада международный классдин спортдин мастер Санан Личгоряеван экуь къаматдиз бахшна кьиле тухвай 5-турнирда 1-чка (ам 61 кг-дин заланвиляй гъалиб хьайибурун арада чип вегьиналди автомашиндизни лайихлу хьана) кьуна. Ам гьакIни азаддаказ кьуршахар кьунай СССР-дин лайихлу тренер Юрий Гусован къамат эбеди рикIел хуьнин лишан яз кьиле тухвай Вирироссиядин жаванрин ачух турнирдин гъалибчи, Дагъустандин жаванрин арада (2016-йис), студентрин арада (2017-йис) чемпион, Россиядин Кубок патал акъажунра 57 кг-дин заланвал авайбурун арада виридалайни хъсан спортсмен (2015-йис), Али Алиеван тIварунихъ галай международный турнирдин (2018-йис) ва Красноярскда “Иван Ярыгин” Гран-Придин (2019-йис) буьруьнждин призёрни я.
Инал мадни рикIел хкиз кIанзава: вичихъ еке устадвал авай чи мад са ватандаш Даурен Куругълиева ва Рамазан Ферзалиева азаддаказ кьуршахар кьунай дуьньядин Кубокни къазанмишнай. Акъажунар алай йисан мартдиз Якутскда кьиле фенай. Финалдин бягьсера Россиядин хкянавай командади 9:1 гьисабдалди Ирандин хкянавай командадин винел инанмишвилелди гъалибвал къазанмишна. Нетижада эхиримжи 8 йисуз сифте сефер яз и турнирда кIвенкIвечи чка кьуна. И еке агалкьуник чи кьве ватандашдин: Даурен Куругълиеван ва Рамазан Ферзалиеван (вири санлай Россиядин хкянавай командадик 7 дагъустанви квай) лайихлу пайни ква, турнирда чи ватандашри чпин вири бягьсер вини дережада аваз кьиле тухвана. Алай йисан июндиз Сочи шегьерда азаддаказ кьуршахар кьунай кьиле фейи Россиядин чемпионатда Рамазан Ферзалиева (61 кг-дин заланвал авайбурун арада) гимишдин медаль къазанмишна.
Чна ватандашдин агалкьунрал дамахзава.
Низам Шагьбанов,
Дагъустандин лайихлу муаллим
