И мукьвара Мегьарамдхуьруьн почтадин алакъадин отделенида 1-классдин почтальон яз кIвалахзавай Алехалум Гьажиагьмедовна Мисрихановадиз яргъал йисарин гьакъисагъ зегьметдай, хиве авай везифаяр чешнелудаказ кьилиз акъудунай, пешекарвал ва кIвалахдиз вафалувал къалурунай Дагъустан Республикадин УФПС-дин директор Р.А.Алибегован къул алаз Гьуьрметдин грамота гана.
А.Мисриханова 1952-йисуз Мегьарамдхуьруьн райондин ЦIелегуьндал дидедиз хьана. Вичин хизан кутурдалай кьулухъ ам Мегьарамдхуьре яшамиш жезва. Почтада кIвалахунин зегьметдин стаж 36 йисалай виниз алатнавай ада хуьруьнвийрин патай гьуьрмет къазанмишнава. Алехалум Гьажиагьмедовна 5 веледдин дидени я.
Шабагь мубарак авуналди, почтадин къуллугъдин важиблу пеше хкяна, агьалийрин игьтияжар тамамарзавай адаз чухсагъул. Къуй квехъ чандин мягькем сагъвал, хизандани хушбахтлувал ва берекат артух хьурай!
Регина Семедова
