«Лезги газетдихъ» галаз датIана алакъа хуьзвай, халкьдин тIал алай, важиблу месэлаяр къарагъарзавай мухбирар чахъ тIимил авач. Ахьтинбурукай садни Замир Мегьамедов я. Ам 1973-йисан 12-декабрдиз СтIал Сулейманан райондин Вини СтIалрин хуьре дидедиз хьана. Буба Насир — тракторист, диде Селем сифте — Кьулан СтIалрин, гуьгъуьнлай Вини СтIалрин хуьрера муаллим тир. Абуру чпин веледарни зегьметдал рикI алайбур яз вердишарна, дуьз рекье твадай тербияни насигьатар гана.
Школа хъсан къиметар аваз акьалтIарай Замираз 1991-йисуз армиядин жергейриз эвер гана. Къуллугъдай вахтунда частуна къуллугъдин уставда къалурнавай везифайрив, намуслувилелди эгечIай адаз младший сержантвилин чин, частунин командирдин къул алай 19 грамота гана. Армиядай хтайла, 1993-йисуз, ам техникумдик экечIна, юриствилин пешедай чирвилер къачуна. Са тIимил вахтунда ада «Юхаристальский» совхозда, гуьгъуьнлай Краснодардин крайдин «Мирный», «Водники» поселокрин агрофирмайра кIвалахна. 2006-йисуз анай хтана, Махачкъалада ЧОП-да, «Сигнал-1» организацияда, гуьгъуьнлай хайи районда хатасузвал таъминарунин рекьяй кIвалахна.
— Гьеле школада амаз лезги чIалал зи рикI пара алай. Тарсара сочиненияр, изложенияр кхьинив зун иллаки рикI гваз эгечIдай, нетижаярни писбур жедачир. Лезги чIалан муаллимар тир Мегьамедов Мирзялиди, Мирзекеримов Садикьа, Турабова Тамамата залай разивал къалурдай. Абуру зун хайи чIалал мадни ашукьарнай. Зун шиирар кхьинални машгъул хьана, — рикIел хкизва Замир Мегьамедова.
Мектеб акьалтIарна гзаф йисар алатнава. Амма хайи чIал хуьникай, адан патахъай къайгъу чIугуникай, лезги адетрикай ва маса жуьреба-жуьре месэлайрай макъалаяр кхьиз, ада «Лезги газет», «Куьредин хабарар» газетрихъ галаз сих алакъа хуьз ингье саки 30 йис хьанва.
Замир Мегьамедован шииррин тематика жуьреба-жуьрди я. Абурун арада ватанпересвилизни хайи чIалаз талукьбуру, насигьатдинбуру иллаки кьетIен чка кьазва. Са шумуд сеферда адаз чкадин телевиденидиз (КТВ-диз) «Эдебиятдин кимел», теклифна. Лезги чIалан муаллим Турабова Тамамата адаз мектебдиз, чIал гегьеншаруниз талукьарнавай ачух тарсаризни теклифзава. Замир Мегьамедова абура ашкъидивди иштиракзава. Шаиррин юбилеяр кьиле тухуникни ада вичин пай кутазва.
Замир Мегьамедоваз чна 50 йисан юбилей рикIин сидкьидай тебрикзава. Къелемдин дустуниз — хъсан къилихрин инсандиз — чна чандин мягькем сагъвал, шадвал хьун, рикIе авай мурадар кьилиз акъатун алхишзава.
«Лезги газетдин» редакциядин коллектив
