РФ-дин Президент Владимир Путинан 2023-йисан 27-февралдиз акъуднавай 123-нумрадин Указдалди лезгийрин милли медениятдин федеральный автономиядин (ФЛНКА) президент Ариф Пашаевич Керимоваз бегьерлудаказ жемиятдин кIвалах кьиле тухунай ва хейлин йисарин гьакъисагъ зегьметдай “Ватандин вилик лайихлувилерай” Ордендин II дережадин Медаль ганва.
Ариф Керимов РФ-дин милли алакъайрин рекьяй кардик квай Советдин членрикай сад я. ФЛНКА-дин регьбер яз, ада, кьилди къачуртIа, лезги халкьдин меденият вилик финик лайихлу пай кутазва. Мисал яз, ада “Лезги газетдин” редакцияди, Алкьвадар Гьасанан тIварцIихъ галай медениятдинни марифатдин центради кьилиз акъудзавай са жерге проектриз пулунин такьатар чара ийизва.
“Лезги газетдин” редакциядин коллективди Ариф Пашаевичаз уьлкведин Президентдин Указдалди ганвай шабагь рикIин сидкьидай мубаракзава, адахъ чандин сагъвал, кIвалахда мадни еке агалкьунар хьана кIанзава.
«Лезги газет»
