Дагъустандин Кьили 2022-йисуз республикадин гьукуматди кьиле тухванвай кIвалахдиз хъсан къимет гана
Сергей Меликова 28-февралдиз РД-дин Халкьдин Собранидин Махачкъалада кьиле фейи сессиядал республикадин Гьукуматдин Председатель Абдулмуслим Абдулмуслимова авур докладдикай вичин фикирар лагьана. Кьилди къачуртIа, республикадин регьберди алатай йисуз гьукуматди кьиле тухванвай кIвалахдилай вичин разивал къалурна.
“Региондин Гьукуматдин Председатель Абдулмуслим Муьгьуьдинович Халкьдин Собранидин вилик метлеблу ва тамам доклад гваз экъечIна.
Заз алатай йисуз чи ватанэгьлийрин яшайиш мадни хъсанарун патал кьиле тухванвай кIвалахдай Абдулмуслим Муьгьуьдиновичаз ва вири министрриз сагърай лугьуз кIанзава. Са жерге районра фадлай вилив хуьзвай мектебарни азарханаяр пайда хьана. Бязи хуьрера агьалияр хъсан еридин хъвадай целди таъминарунин месэлаяр гьялна. Дагълух районра йигин камаралди хуьруьн майишатни туризм вилик физва, промышленностдин карханайрихъ хъсан нетижаяр хьанва, инвестицийрин чIехи проектар кьилиз акъудзава, кIвалахдай цIийи чкаяр пайда жезва.
КIвалахрин менфятлувал чна, сифте нубатда, рекъемралдини гьахъ-гьисабралди ваъ, инсанрин гьиссералди тайинарзава. Гьялна кIанзавай месэлаяр ама, зун и кардин гъавурда акьазва. Чна гьелелиг чилинни эменнидин алакъайрин къурулушда, ЖКХ-да, электричестводиз, жемиятдин улакьриз талукь месэлайра къайда тунвач. Амма авай гьаларин гьакъиндай кьил-кьилел алаз тешкилнавай ахтармишунри чаз абур гьикI гьялна кIанзаватIа къалурнава ва и рекьяй чна гьакъикъи камарни къачузва.
ЦIи республикада кьилиз акъудзавай государстводин гьич са программани акъваз жедач. Арадал къвезвай гьар са месэла абурун важиблувилиз килигна гьялда — инсанрик виридалайни гзаф къалабулух кутазвай месэлаяр чна сифте нубатда гьялна акьалтIарда.
За гьукумдин вири органрин патай менфятлу кIвалах вилив хуьзва. Эхирки чи вилик акъвазнавай месэла умумиди я – республика вилик фин таъминарун ва дагъустанвийрин яшайишдин ери хъсанарун», — къейдна Сергей Меликова.
Агьмед Магьмудов
