25-февралдиз СтIал Сулейманан райондин Кьулан СтIалрин Р.Халикьован тIварцIихъ галай мектебда чIехи классра кIелзавай аялрин арада математикадай II олимпиада кьиле фена. Къейд ийин хьи, муниципалитетдин администрацияди тешкилзавай и мярекатдиз пулунин такьатар мергьяматлувилин “Иман” фондуни чара ийизва.
Олимпиада ачухдайла, райондин кьилин сад лагьай заместитель Лацис Оружева муниципалитетдин образованидин хел вилик тухуник еке пай кутунай Ханбалаеврин хизандиз ва кьилди меценат Фируза Керимовадиз сагърай лагьана. Анал рахай ДГУ-дин математикадин ва компьютеррин илимрин факультетдин декан Амучи Якьубова, СтIал Сулейманан райондин администрациядин образованидин управленидин начальник Гьуьсейн Шихбабаева ва “Иман” фондунин векил Шакир Агъаримова мярекатдин важиблувиликай чпин фикирар лагьана, аялрихъ агалкьунар хьун алхишна.
Олимпиадада, санлай къачурла, СтIал Сулейманан, Ахцегь, Докъузпара, Мегьарамдхуьруьн, Кьурагь ва Хив районрай 60-далай виниз аялри иштиракна.
11-классра кIелзавай аялрин арада 1-чка — Ахцегьрин 1-нумрадин юкьван мектебдин ученица Р.Шагьэмировади, 2-чка — СтIал Сулейманан райондин ЦIийихуьруьн юкьван мектебдин ученик Ш.Тагьирова, 3-чка Кьасумхуьруьн 1-нумрадин юкьван мектебдин ученица А.Демировади кьуна. 10-классра кIелзавай аялрин арада 1-чкадиз — Кьурагь райондин КIирийрин хуьруьн юкьван мектебдин ученица Л.Абдулкеримова, 2-чкадиз — Мегьарамдхуьруьн райондин ЦIийихуьруьн юкьван мектебдин ученица Д.Набиева ва 3-чкадиз Докъузпара райондин Мискискарин хуьруьн юкьван мектебдин ученик А.Алискеров лайихлу хьана.
КIвенкIвечи чкаяр кьур аялризни абурун муаллимриз “Иман” фондунин патай грамотаярни пулдин пишкешар гана.
Агьмед Магьмудов
