Хизан… Чи уьмуьрда вири хизандилай башламиш жезва. Гьа са вахтунда, кьетIен чка муаллимрини кьазва. Гьар са несилдихъ вичин муаллимар ава. Къенин чи суьгьбет Гьажиагьмедоврин муаллимрин тухумдин векилриз талукь жеда.
Хейрудин Мурадович Гьажиагьмедов Каспийск шегьерда гзафбуруз чидай кас я. Ам 1957-йисан 1-декабрдиз СтIал Сулейманан райондин Зизикрин хуьре, Ватандин ЧIехи дяведин ветеран Мурад Гьажиагьмедовичан хизанда дидедиз хьана. Хуьруьн мектеб акьалтIарайдалай кьулухъ ам Хасавюртдин З.Н.Батырмурзаеван тIварунихъ галай педучилищедик экечIна. 1978-йисуз ада кIелунар Краснодардин физический культурадин институтда давамарзава. Вуз акьалтIарай ада хайи хуьре физкультурадин муаллимвиле кIвалахиз башламишзава. 1981-йисалай инихъ Хейрудин Мурадовича Каспийск шегьердин 6-нумрадин ПТУ-да (алай вахтунда — пешекарвилинни педагогикадин колледж) физтербиядин рекьяй руководитель яз кIвалахзава. Муаллимдин гьакъисагъ зегьмет «Халкьдин образованидин отличник» лишандалди къейднава. Ам зегьметдин ветеран я.
Гьеле 1979-йисуз армиядин жергейра къуллугъ авуна хтайдалай кьулухъ Хейрудин Мурадовича вичин кьисмет Хив райондин Цацарин хуьряй тир гуьзел тават Санжар Казбековнадихъ галаз сад авуна.
Дербентдин педучилище акьалтIарай жегьил муаллим Санжар Казбековнади вичин зегьметдин рехъ хайи хуьре сифтегьан классрин муаллим яз кIвалахунилай башламишна. 1982-йисалай къенин йикъалди ада Каспийскдин «СОШ №3» МБОУ-да тарсар гузва. Санжар Гьажиагьмедовадин тIвар мектебдин тарихда баркаллу краралди гьатнава. Адан зегьметдин рехъ тамамдаказ и мектебдихъ галаз алакъалу я.
Муаллимдин пеше четинбурукай сад я, ада и рехъ хкягъай касдивай датIана яратмишунин гьевес, аялрал рикI хьун, руьгьдин мердвал истемишзава. Вири и ерияр Санжар Гьажиагьмедовадиз — Каспийск шегьердин 3-нумрадин школадин сифтегьан классрин муаллимдиз хас я. Еке гьуьрметдиз лайихлу пешекар, яратмишунин тегьерда кIвалахзавай муаллим, ихтибар ийиз жедай дуст ва юлдаш. Яргъал йисара кIвалахунин тежриба авай Санжар Казбековнади школадин методкIватIалра ва педсоветра вичин амадагар тир муаллимриз пешедин сирер, кьетIенвилер ачухда. КIевелай истемишунардай, гьа са вахтунда масадан дердидикай хабар кьадай, инсанрив рикI гваз эгечIдай адаз гьар са аялдихъ галаз рафтарвалдай тегьер чида. Ачух чин ва пешедал рикI хьун, ада гьисабзавайвал, агалкьунрин бине гьа идакай ибарат я. Образованидин къурулушда гзаф йисара зегьмет чIугунай Санжар Казбековнадиз 2011-йисуз «Умуми образованидин гьуьрметлу работник» ва «Зегьметдин ветеран» тIварар гана.
Хизандин ивирар, адет яз, дагъустанвийри несилрилай несилрал агакьарзава, абуру несилрин арада кьетIен алакъа арадал гъизва. Хейрудин Мурадовичан ва Санжар Казбековнадин хизанда пуд руш ава: Ингрит, Марьяна ва Милана. Мектеб гимишдин медалдалди акьалтIарай Ингрит 1999-йисуз ДГУ-дин филологиядин факультетдик экечIзава. Вад йисалай жегьил пешекарди вичин зегьметдин рехъ Дербентдин педучилищеда башламишзава. Са йис алатайла, ам Каспийскдин 3-нумрадин мектебдиз урус чIалан муаллим яз хквезва, къенин йикъалди гьа ина кIвалахзава. 2017-йисуз Ингрит Хейрудиновнади «Йисан муаллим» конкурсдин муниципальный паюна иштиракзава ва ам 3-чкадиз лайихлу жезва.
Муаллимдин баркаллу пеше кьвед лагьай руш Марьянадини хкяна. ДГУ-дин филологиядин факультет акьалтIарайдалай кьулухъ ада Каспийскдин «СОШ №1» МБОУ-да сифтегьан классрин муаллим яз зегьмет чIугвазва. Мукьвал йисара Гьажиагьмедоврин тухумдин тар цIийи несилдин муаллимралди алава хъжеда, гьикI лагьайтIа, хтул Маинадини чIехи дидединни бубадин рехъ хкянава.
Хейрудин ва Санжар Гьажиагьмедоврин гъвечIи руш Миланади 2012-йисуз Санкт-Петербургда авай Россиядин государстводин А.И. Герценан тIварунихъ галай педуниверситет акьалтIарна. Ам Санкт-Петербург шегьердин «Педагогвилин устадвилин сергьятар» конкурсдин лауреат я.
Муаллимвал Гьажиагьмедоврин хизандин-тухумдин чIехи пай векилар патал уьмуьрдин пеше хьанва. Гьа жергедай яз — Хейрудин Мурадовичан стха Фейзудин ва адан уьмуьрдин юлдаш Женнет Эбедуллаевна патални. Абуру чпин рикIерин чимивал чи мектебда кIелзавай аялриз гуз гзаф йисар я. Фейзудин Мурадович гзаф савадлу ва зегьметдал рикI алай пешекар я. Вичин пешедив рикI гваз эгечIзавай ада гзаф кьадар чемпионриз ва акъажунрин гъалибчийриз тербия ганва, вердишарнава. Женнет Эбедуллаевнадини чи мектебда сифтегьан классрин муаллим яз кIвалахзава. Адан зегьметдин рекье тербиядин рекьяй завуч хьайи вахтарни ава. Аялриз ам гзаф кIанда, адаз гьуьрметда. Гзаф маса муаллимриз хьиз, адазни пешедикай уьмуьрдин рехъ хьанва. Женнет Эбедуллаевна «Халкьдин образованидин отличник» ва «Зегьметдин ветеран» баркаллу тIварарин сагьиб я.
ЧIехи несилдин ихьтин насигьатчияр патав хьайила, гьар са кар агалкьунралди кьилиз акъудиз жеда.
Камила Гьажиева,
Каспийскдин 3-нумрадин мектебдин муаллим
