2024-йисан 24-ноябрдиз КцIар шегьердин кьилин ктабханадин чIехи залда лезги эдебиятдин «Марвар» кIватIалди, лезги медениятдин «Самур» меркезди ва «Алам» ТВ-ди Дагъустандин халкьдин шаир СтIал Сулейманан — 155, Теймур Алиханован — 100 ва Гуьлалийрин Эйвазан 55 йисан юбилейриз талукьарнавай мярекат кьиле тухвана.
Саки кьуд сятда давам хьайи и межлисда лезги интеллигенциядин векилрикай Гуьлалийрин Эйваза, Вакъиф Муьшкуьрвиди, Магьсим Магьсимова, Бегьрам Залова, Гуьнеш Мевланова, Айдан Айдемировади, Оруж Оружева, Римма Гьажимурадовади, Бести Нифтиевади, Самая Алихановади, Нижабат Мамедалиевади, Китабе Ризвановади, Метин Айдемирова, Элшад Шалбузова, Зиядхан Мурадханова, Нурлан Агъабегова, Руслан Межмуллаева, Абир ЭчIехвиди, Жавид Тагьирова, Энжам Веледова, Жуьмшуьд Айдемирова, Ясин Нежефова, Себзулла Келбалиева, Мамед Ражабова, Агъабала Агъабалаева, Къасида Ибрагьимовади иштиракна, лезги шаиррин уьмуьрдин рекьерикай ва абурун эсеррикай ихтилатарна.
Манидар Факъил Велиметова СтIал Сулейманан гафариз композитор Къагьриман Ибрагьимова кхьенвай ва Адил Сафарова аранжировка авунвай «Къуват ава чаз», Теймур Алиханован гафариз Расим Бакарова кхьенвай «Хуьх на жуван михьивал» манияр пара иердиз тамамарна. Гьевескар композитор ва манидар Руслан Межмуллаева Гуьлалийрин Эйвазан гафариз кхьенвай «Хъша зи ахвариз, диде» тIвар алай мани гитарадал тамамарна. Манидар Роза Гьажимурадовадини «а капелла» хьиз лагьай лезги халкьдин манийрикай попурри межлисдиз атанвайбурун рикIериз мелгьем хьиз чкIана.
КцIар шегьердин 1-нумрадин мектебдин 5-синифда кIелзавай Умар Элескерова, Теймур Алиханован шиирар кIелуналди, межлисдик вичин пайни кутуна.
Лезги эдебиятдин сувариз элкъвей и межлис Къурбаналийрин Камрана кьиле тухвана ва «Алам» ТВ-дин операторар тир Насир Мегьеремовани Рамик Исмаилова видеокамерадиз чIугуна.
Марвар
