Дагъустан Республикада, милли “Образование” проектдин сергьятра аваз, “Гележегдин муаллим” федеральный проектдин кIвалах башламишнава. Идахъ галаз сад хьиз Дагъустандин образование виликди тухунин институтдин бинедаллаз алай аямдин кьве центр ачухнава — Пешекарвилин дережадиз къимет гудай центр ва Педагогикадин работникрин пешекарвилин бажарагъ датIана хкаждай центр.
Центраяр арадал гъунин макьсад пешедин рекьяй виликди фин патал тIем акакьдай шартIар арадал гъун, муаллимриз чпин бажарагъ тамамдаказ ачухдай мумкинвал гун ва республикада пешекар педагогрин кьитвал арадай акъудун я.
“И центрайри муаллимрин пешекарвилин дережа хкажунин къурулушдик бинедилай дегишвилер кутун лазим я. Ва иниз гьар са муаллим атун чун патал важиблу кар я. Республикада гьар йисуз алай аямдин тадаракралди таъмин тир цIийи мектебар ачухзава, амма гьакъикъатда чаз аквазвайвал, чи муаллимриз гзаф дуьшуьшра и тадаракар гьикI ишлемишдатIа чир жезвач. Муаллимрин пешекарвилин дережа хкажунин кар чарарал алаз, тIвар патал кьиле фин лазим туш. Чна чи муаллимриз пешедиз талукь тир вири чирвилер ва вердишвилер къачунин карда куьмек гун лазим я”, — къейдна центр ачухунин мярекатдал РД-дин Гьукуматдин Председателдин заместителдин везифаяр вахтуналди тамамарзавайда — РД-дин образованидин ва илимдин министр Уммупазиль Омаровади.
Центрайра чирвилер къачун пулсузди жеда ва сифтегьан йисуз иниз тахминан 5 агъзур педагог желбдайвал я. Центрайрин кIвалах образование виликди тухунин карда алай аямдин гьерекатар гьисаба кьуна туькIуьрнавай инновациядин технологийрал бинеламиш хьанва.
Центрайра муаллимар патал арадал гъанвай шартIариз, алай аямдин тадаракриз ва техникадин рекьяй ина авай мумкинвилериз репсубликадин РД-дин Халкьдин Собранидин председатель Хизри Шихсаидова виниз тир къимет гана.
“Зун иниз вад йис идалай вилик атайди тир, амма заз а чIавузни къе аквазвай шейэр — ибур чилни цав хьиз тафаватлу я. Центраяр туькIуьрнавай жуьреди шадвал кутазва. Муаллимрин зегьмет зурбади я. Абуруз чи куьмекдин игьтияж ава. Ва чна исятда кьабулзавай бюджетда муаллимар патал жуьреба-жуьре кьезилвилер фикирда кьунва”, — къейдна ада.
Педагогикадин работникрин пешекарвилин бажарагъ датIана хкаждай центради ва Пешекарвилин дережадиз къимет гудай центради сада садахъ галаз алакъада аваз кIвалахда. Тамамарзавай везифайрал гьалтайла, абуру сада масад алава хъийида. ИкI, муаллимрин пешекарвилин дережа хкаждалди вилик сифтедай абурун чирвилер ахтармишда, яни педагогри стандартрив кьунин дережадиз талукь имтигьар вахкуда ва адан нетижада къимет гуда.
«Лезги газет»
