Чи ватанэгьлияр — гьар сана

Гьейранвилелди лезет хкудиз жедай шикилар чIугваз алакьзавай художникар чахъ гзаф авайдакай газетдин чинра идалай виликни са шумудра кхьенай. И мукьвара чаз мад са лезги художникдин бажарагълувиликай хабар хьана. Ихтилат 1978-йисуз Ростов шегьерда дидедиз хьайи Анна Алихановна Чубановадикай я.

Художниквилин хиляй РГААИ (Ростовдин архитектурадинни искусстводин гос­академия) куьтягьай 2001-йисалай ада Кьиб­лепатан Федеральный университет­дин архитектурадинни искусстводин ака­демия­дин живописдинни скульптурадин­ кафед­рада чIехи преподаватель яз кIва­лахзава. Ам илимдал, ахтармишунрал, методикадин кIвалахрал машгъул жезва.

Анна Чубанова 2003-йисалай Россиядин художникрин Союздин, 2019-йисалай вири халкьарин педагогрин-художникрин Союздин член я. 2019-йисуз ада Россия­дин художествойрин академияда живописдай чирвилер къачуна.

Анна Алихановна вири халкьарин дережада аваз кьиле фейи хейлин выставкайрин, конкурсрин гъалибчи я: 2013-йисуз — Берлинда, 2014-йисуз — Женевада, 2015-йисуз — Софияда, 2016-йисуз — Минскда, 2017-йисуз Владимирда, 2019-йисуз — Сицилияда, 2020-йисуз — Барселонада. И агалкьунрилай гъейри, ада уьлкведин жуьреба-жуьре регионра кьиле фейи вишелай виниз выставкайра вичин бажарагъдин бегьерар раижнава.

2015-йисуз Железноводскда «Гележегдин архитектурадинни художественный образованидин майданар» темадай адан илимдин макъала чапдай акъатна.  Вири халкьарин илимдинни тежрибадин конференция патал ада «Архитектура ва искусство: умуми малуматар ва тежриба» темадай кхьей макъала гзаф метлеблуди хьана.

Алакьунар авай художник, муаллим яз, ада Ростовда гьар йисуз институтрин студентрин арада конкурсар-выставкаяр тешкилзава, живописдин хиляй тежриба раижунин серенжемар кьиле тухузва. Адан регьбервилик кваз чирвилер къачузвай студентри Россиядин, гьакI дуьньядин дережадин выставкайрани, конкурсрани агалкьунар къазанмишзава.

Яратмишунин, муаллимвилин рекье бажарагълувилелди, бегьерлувилелди кIвалахунай Анна Чубановадиз Россиядин медениятдин министерстводи, Рос­товдин областдин медениятдин минис­терстводи, «Россиядин художникрин Союзди» ва цIудралди маса идарайри, тешкилатри, регионрин министерствойри дипломар, грамотаяр ганва.

Чи ватанэгьлидин яратмишунар гьам Россиядин, гьам къецепатан уьлквейрин хсуси коллекцийра ава. Чаз адахъ мадни еке агалкьунар хьана кIанзава.

К. Къалажухви