И мукьвара чаз малум хьайивал, мартдин вацран сифте кьиляй «Футболдин федерация» ДРОО-ди Мегьарамдхуьруьн райондин футболдин «Леки» командадин тренер Тофик Къадимов Дагъустандин футболдай чемпионатдин 2023-йисан сезондин виридалайни хъсан тренер тирди диплом гуналди тестикьарнава. Мубаракрай чи ватанэгьлидиз и агалкьун!
РикIел хкин, Дагъустандин футболдай виридалайни машгьур «Леки» командади алатай йисан октябрдиз кьиле фейи финалдин гуьруьшда «Темир-Хан-Шура» (Буйнакскдин район) командадин винел 3:1 гьисабдалди гъалибвал къазанмишна. Идалди «Леки» командади Дагъустандин чемпионвилин кубок 8-сеферда къазанмишна. Гьа са вахтунда Тофик Къадимова тренер-чемпион лагьай тIвар къазанмишиз им кьвед лагьай йис я.
Къадимов Тофик Ражабович Мегьарамдхуьруьн райондин Гилийрин хуьре 1989-йисан 16-январдиз дидедиз хьана. Хуьруьн юкьван мектебда кIелиз, ада футболдай спортдин секциядани вердишвилер къачузвай. Спортдал гъвечIи чIавалай рикI алай жегьилди и рекьяй пешекарвал Дербент шегьерда, Дагъустандин образованидин ва культурадин академиядин (ЧУВО ДАОК) «Физический культура» факультет акьалтIаруналди къачуна.
Идалай кьулухъ алатай йисара ам Мегьарамдхуьруьн «Леки», Лекбатандин «Къарадагъ» (Азербайжан), Каспийскдин «Дагдизель», Калининграддин «Балтика» (ФНЛ), Махачкъаладин «Динамо-легион», Майкопдин «Дружба» (2-лига), Новороссийскдин «Черноморец» (2-лига), гьакIни Азербайжандин олимпийский командайрик кваз къугъвана. Къейд ийин, «Дружба» ва «Черноморец» дестейрик кваз кьиле фейи чIехи турнирра ада 3-чкаяр кьуна.
Тофик Къадимован агалкьунрик жаванрин арада Россиядин чемпионвилин (2005-йис), Дагъустандин 8 сеферда чемпионвилин, Азербайжандин чемпионвилин (1-лига, 2012-йис) тIварар ква, ам гьакIни Республикадин кубокдин (2 сеферда) ва футболдай КФК-дин «Юг» зонадин (2016-йис) кубокдин сагьиб я.
Дагъустандин футболдай чемпионатра «Леки» командадик кваз иштиракиз, адакай пуд сеферда сезондин виридалайни хъсан гьужумдайди (нападающий) хьана. 2022-йисалай Тофик Къадимов «Лекидин» къугъвазвай тренер я. Адан регьбервилик кваз командади футболдай 2022-йисуз Дагъустандин чемпионатда ва республикадин Кубок патал къугъунра гъалибвал къазанмишна.
Пешекарвилин спорт, кьилди къачуртIа, футбол уьмуьрдин рехъ яз хкягъуниз куь таъсирна лагьай суалдиз жаваб яз Тофик Ражабовича къейд авурвал, и жуьредал адан рикI лап гъвечIи чIавалай алай.
— ГъвечIибур тирла, чахъ хуьре анжах футболдай ва залан атлетикадай вердишвилер къачудай мумкинвал авай. А чIавуз чахъ Гилийрал Дагъустандин турнирра иштиракзавай «Алпан» команда авай (тренер — Руслан Керимханов). Футболдай гуьруьшар хьайила, рикIел алама, чун кIватI жедай, еке гьевесдивди абурун къугъуниз тамашдай. А чIавуз чахъ хуьре хъсан тренерни авайди тир — Агъабегов Рамиз. Адан гъилик кваз чна, 20-25 аялди, саки пешекарвилелди футболдай вердишвилер къачузвай, — суьгьбетзава ада.
Чи ватанэгьлиди мадни рикIел хкизвайвал, кIвач тIа хьун себеб я, ам футболдикай къерех жедай чкадал атанай. А чIавуз ам зур йисан вахтунда залан атлетикадал машгъул хьана. Амма, футбол гададин рикIяй акъатнач.
2007-йисуз, яни «Леки» команда арадал гъайила, Азербайжандин КцIар райондин Ширвановкадай хъсан тренердиз теклифнай. Ада пуд йисуз кIвалахна. Амма 2010-йисуз тренерди вичин гъилик вердишвал къачунвай кьуд жегьил, гьа жергедай яз Тофикни, КцIарин «Шагьдагъ» командада къугъун патал тухвана. Жегьилар ахтармишунрай нетижалудаказ акъатна ва Азербайжандин командадик кваз къугъваз башламишна.
— Квевай исятда акьалтзавай аялрихъ элкъвена вуч лугьуз жеда? — суал гана чна тренердиз.
— За аялриз спортдал машгъул хьуниз эвер гузва. Зи фикирдалди, футбол спортдин виридалайни хъсан жуьре я. Эгер чи вахтара авайди анжах «Дагдизель» команда тиртIа, гила пешекар спортдин хиле къугъвазвай командаяр гзаф хьанва. Ингье «Динамо» (Махачкъала) команда къведай йисуз высший лигадиз акъатда, кьвед лагьай лигада кьвед-пуд команда ава, пуд лагьай лигадин дестеярни Россиядин турнирра къугъвазва. Акьалтзавай аялар патал мумкинвилерни, шартIарни лап хъсанбур я. КIанзавайди анжах диде-бубайрин патай са тIимил куьмек я, аялар куьчейра чеб чпин ихтиярда тежедайвал. Зи фикирдалди, аялдиз азад вахт гьич хьана кIанзавайди туш. Тарсарилай гуьгъуьниз ам спортдин рекье хьана кIанда. Вучиз лагьайтIа, аялар чIуру рекьиз ялдай шейэр исятда дуьньяда гзаф хьанва. Футбол, къуршахар кьун, залан атлетика… — рикI алай рехъ хкяна, адал рикIивай машгъул хьайи инсан и кардал садрани пашман жедач.
Жасмина Саидова
