4-июль, Ахцегьар, пакаман бере. Па­талай­ атанвай журналистар ина, тамашуниз ла­йихлу чкайрин шикилар ягъиз, инсанрихъ галаз рахазва. Эхиримжи вахтара райондин дагъ­лух хуьрерани туризм артмиш жезвай шар­тIа­ра и кар адетдиз элкъвенва, инсанар вердиш хьанва. Чун мугьманрихъ галаз ­мукьувай таниш хьана. Журналист  Анатолий  Сулеймановни  кино­режиссёр  Альберт  Хач­ма­­нукян  — Москвадин “База медакроскт” фирмадин векилар — Дагъустанда туристриз гьеле­ са артух малум тушир чкайрикай­ Ютуб-ка­­нал­диз документальный гъве­чIи кинофильмаяр туь­кIуьриз атанва.

— Ингье 3-4 югъ я чун, блогерар, жу­ван ху­шуналди Дагъустандин тамашуниз лайихлу чкайра къекъвез, чкадин жемятдихъ галаз­ суьгьбетар ийиз, — лугьузва абуру. — Месела, До­къуз­­­пара районда чпиз тешпигь авачир хьтин гуьзел ва гьайбатлу Яру дагъди, Базар-Дуьзуьди, Шалбуздагъди ва анра альпинистрин маршрутри чаз екез таъсирна. Европада ви­ри­далайни кьакьан дагълух Къурушри­н­ хуьре­ мехъерик хьана. Чна фикирнавай хьи, ана свас балкIандаллаз гъида. Амма ваъ, джипдаваз гъана. Къули райондин Цовкрада — симинин пагьли­ван­ри­кай, Вачида — чату­хъанрикай, Да­хада­ев рай­ондин Кубачи хуьре — яракь­рин ус­­тIаррикай, Рутул райондин Хъуьлуь­да­ хуьруьн саларбанрикай зарисовкаяр туькIуьрна. Ингье ги­ла Ахцегьиз акъат­нава. Ина, гьакъи­къатдани, инсандиз эсердай, гьейранардай гуьзел тIебиат ава. Юкьван асирра арадал гъанвай архи­тектурадин имаратри (абур девирдин цIийи­виле­рикай хвена, гележегдин несилриз таз хьа­найтIа хъсан тир) чпел фикир желбзава. Фикирдик Ахцегьрин машгьур музейдикай, урусрин ХIХ асирдин къеледикай, чими, дармандин ятарин гьамамрикай итижлу сюжетар яратмишун ква. Къуй чир хьурай вирибуруз, Дагъустанда тамашуниз, сагъламвал мягькемаруниз ва ял ягъуниз лайихлу ва гьа са вахтунда па­рабуруз малум тушир гьихьтин хъсан, секин хелвет пипIер аватIа.

Дашдемир Шерифалиев