Белиждин искусстводин школада са шумуд ансамбль, десте, кружок кардик ква. Ана кIвалахзавай тежрибалу муаллимри аялриз жуьреба-жуьре рекьерай чирвилер гузва, абуруз чпин алакьунар дуьздал акъудиз куьмек гузва. КIвалахда агалкьунар авай муаллимрикай яз, завай вичихъ саки 35 йисан тежриба авай Сефербег Сефербегован тIвар кьаз жеда. Зун адахъ ва ада вердишвилер гузвай рушарин кьуьлерин “Кавха” дестедихъ галаз Кьасумхуьрел лезги халкьдин къагьриманвилин “Шарвили” эпосдин суварин мярекатда таниш хьана. Милли парталар алаз, рушари суварин майдандал осетин халкьдин кьуьл а къайдада тамамарна хьи, мярекатдин иштиракчийри абуруз яргъалди капар яна.
Концертдин программадин эхирдай тамашачийрин тIалабуналди “Кавха” дестедин рушари мад са шумуд кьуьл тамамар хъувуна.
Сефербег Сефербегова чаз лагьайвал, “Кавха” десте искусстводин школада 3- классда вердишвилер къачузвай рушарикай арадал гъанва. Алай вахтунда ана 12 руша кьуьлер чирзава, чпин устадвал хкажзава. “Кавхадин” программадик неинки Дагъларин уьлкведин, гьакIни Россиядин ва къецепатан уьлквейрин халкьарин кьуьлерни ква.
Мадни малум хьайивал, рушарин кьуьлерин дестеди неинки Белижда ва Дербент районда, гьакIни Кьиблепатан Дагъустандин маса районра кьиле тухузвай медениятдин, образованидин, марифатдин мярекатрани чпин алакьунар къалурзава. Абурун устадвал, бажарагъ грамотаяр, пишкешар гуналди къейднава. Чи мурад абурухъ мадни еке агалкьунар хьун я.
Хазран Кьасумов
