Алай йисан 26-февралдиз Россиядин Федерациядин Яракьлу Къуватрин финансринни экономикадин къуллугъдиз талукь музейда уьлкведин военный финансринни экономикадин къуллугъдин бине кутурбурукай сад тир Михаил Васильевич Лезгинцеваз бюст эцигунин шадвилин мярекат кьиле фена. Лугьун лазим я хьи, музей Россиядин оборонадин министерстводин военный университетда ава.
Бюст ачухуниз талукьарнавай мярекатда Россиядин казначействодин руководителдин заместитель Станислав Прокофьева, Россиядин казначействодин регьбердин куьмекчияр Александр Смирнова, Владимир Зайцева, казначействодин крар идара ийидай управленидин начальник Андрей Журавлева иштиракна.
Идалайни гъейри, шадвилин мярекатдал военный университетдин командование, Россиядин Яракьлу Къуватрин финансринни экономикадин къуллугъдин ветеранрин советдин векилар, Россиядин оборонадин министерстводин офицерар, университетдин преподавателар, курсантар ва гьакI Лезгинцеван хизандин векиларни атанвай.
М.Лезгинцеван бюст финансринни экономикадин къуллугъдин ветеранрин советдин председатель, запасда авай генерал-полковник Василий Васильевич Воробьева ачухна.
Мярекатдин иштиракчийри уьлкведин лап четин вахтунда армия финансралди таъминарунин карда Михаил Васильевич Лезгинцева чIугур зегьметдикай ва ада финансринни экономикадин къуллугъ арадал гъуник кутур еке паюникай лагьана. М.Лезгинцева гьа вахтунда арадал гъайи къуллугъдикай Ватандин ЧIехи дяведин йисарани менфят къачуна.
Россиядин казначействодин делегацияди военный университетдин музейдиз советрин аскеррин игитвилерикай шагьидвалзавай тарихдин метлеб авай документар вахкана.
«Лезги газет»
