Дагъустандин Кьилин везифаяр вахтуналди тамамарзавай Сергей Меликован 2021-йисан 24-мартдиз акъуднавай 49-нумрадин Указдалди Лезгийрин СтIал Сулейманан тIварунихъ галай государстводин музыкадинни драмадин театрдин артист Агъахан Рамазанович Агъахановаз “Дагъустан Республикадин халкьдин артист” лагьай тIвар ганва (Указ РД-дин Кьилин официальный сайтда чапнава).
“Лезги газетдин” редакциядин коллективди Агъахан Рамазановичаз и чIехи тIвар рикIин сидкьидай мубаракзава ва адахъ чандин сагъвал, яргъи уьмуьр, мадни еке агалкьунар хьана кIанзава.
А.Агъаханов 1945-йисан 20-декабрдиз Сулейман-Стальский райондин Кьеанрин хуьре Ватандин ЧIехи дяведин иштиракчи Рамазан Агъаханован хизанда дидедиз хьана. Ада, хуьряй кIвачи-кIвачи физ-хквез, Хутаргърин юкьван школада кIелна. Анаг акьалтIарай искусстводал ашукь жегьил Дербент шегьердин культпросветучилищедин халкьдин алатрин отделенидик экечIна. Гуьгъуьнлай Азербайжандин Гьукуматдин искусствойрин институтдин драмадин ва кинодин актеррин факультетда кIелна.
Институтдин студентри — гележегдин артистри, дипломдин кIвалах яз, Шиллеран “Фендигарвал ва муьгьуьббат” тамаша къалурнай, ам Дербентда, Махачкъалада еке вакъиа яз кьабулнай. Тамашада А.Агъаханова тамамарай Миллеран ролдиз театрдин критикри еке къимет ганай.
1972-йисалай инихъ къенин йикъалди Агъахан Рамазановича вичин уьмуьр, кьадар-кьисмет Лезгийрин театрдихъ галаз алакъалу авуна. Тамам 48 йисуз! Сегьнедиз бахшнавай вичин уьмуьрдин рехъ халкьдин рикI алай артистди давамарни ийизва.
Лезги театрдин артистди — сегьнедин устадди художественный кинойрани са шумуд къамат арадал гъана. Абурукай яз “Кольцо старого шейха” фильмда Агъахан Агъаханов къугъвай милициядин начальникдин, “Именем закона Мехмана” фильмда — пулеметчикдин, “Севиль” кинода — Атакишидин, “Кавказский пленник” фильмда Палачдин тIварар кьаз жеда…
«Лезги газет»
