16-сентябрдиз Москвада, М.Рудоминодин тIварцIихъ галай къецепатан эдебиятдин ктабханада, шаир Расул Гьамзатован 100 йисан юбилейдиз талукьарнавай «Зи Дагъустан. Чи Расул» фестивалдин сергьятра аваз лезги чIалан ва медениятдин югъ кьиле фена.
Мярекат ФЛНКА-ди ва РФ-дин Президентдин патав гвай РД-дин гьамишан векилханади тешкилна. Меркезда авай Лезгийрин милли тешкилатдин пресс-къуллугъди хабар гузвайвал, мярекатдин иштиракчийриз лезги гам хрунин мастер-классдиз, Дагъустандин халкьарин сеняткарвилериз талукь затIариз, этнодизайнер Каринэ Рамазановадин кIвалахрикай ибарат «Лезги сумаг» выставкадиз килигдай, лезги афарар дадмишдай мумкинвал хьана.
Гуьгъуьнлай фестивалдин иштиракчийриз концерт гана, сейли мугьманри тебрикдин гафар лагьана. Кьилди къачуртIа, мярекатдал РФ-дин Президентдин патав гвай Дагъустандин векилханадин патай Гьажимурад Кажлаев, ФЛНКА-дин президент Васиф Гьасанов, Докъузпара райондин кьил Мегьамед Шамилов, Россиядин халкьарин кIвалин директордин меслятчи Тимур Мугьамедов, Дагъустандин писателрин Союздин лезги секциядин регьбер Максим Алимов рахана.
Мярекатдин эхирдай шаир М.Алимова лезги диктант кьиле тухвана. Диктантдин текст яз Р.Гьамзатован «Зи Дагъустан» ктабдай лезги чIалаз таржума авунвай, шаир СтIал Сулейманакай кхьенвай макъаладин са чIук хкянавай. Диктант вишев агакьна ватанэгьлийри кхьена.
Чи мухбир
