26-майдиз Москвада мискIинда Рамазандин алачухда меркезда яшамиш жезвай лезгийрин ифтардин мярекат кьиле тухвана. Ина ам жуьреба-жуьре халкьарин векилар тир дестейри, гьа гьисабдай къецепатан уьлквейрай тир халкьарин векилри кьиле тухуз 10 йисалайни гзаф вахт алатнава. Идан гьакъиндай “Лезги газетдиз” мергьяматлувилин “ЛЕКИ” фондунин пресс-къуллугъди хабар гана.
“ЛЕКИ” фондуни ФЛНКА-дихъ галаз санал и чIехи мярекат тешкиллудаказ кьиле тухун патал ийизвай харжияр чпин хивез къачуз кьвед лагьай йис я.
“Ифтардин мугьманар патал активистри лезгийриз тарихдиз талукь видеоролик гьазурнавай (и кардай Фарид Керимоваз сагърай лугьузва), лезги халкьдиз талукьарнавай викторинани кьиле тухвана.
Ифтардин мярекатдал тебрикдин келимаяр рахана:
ФЛНКА-дин президент, миллетрин арада алакъайрин рекьяй РФ-дин Президентдин патав гвай Советдин член Керимов Ариф Пашаевич, “ЛЕКИ” фондунин генеральный директор Гьасанов Гьасан Гьайдарович, РАН-дин Шаркь патан месэлайрал машгъул Институтдин директордин заместитель Аликберов Аликбер Къалабегович, Плеханован тIварунихъ галай РЭУ-дин алава образование гунин ва филиалрин рекьяй проректор, экономикадин илимрин доктор Асалиев Асали Мегьамедалиевич, журналист, политический илимрин кандидат, Кавказдин халкьарин Россиядин Конгрессдин сопредседатель, Шаркь патан месэлайрал машгъул Институтдин илимдин чIехи къуллугъчи Къурбанов Руслан Вячеславович, Мегьарамдхуьруьн районда РД-дин муфтиятдин векил Шамил Рагьманов ва общественный, диндин маса деятелар.
Разивилин кьетIен келимаяр лугьуз кIанзава: минеральный ятарин “Самур” ООО-дин иесидиз, Кавказдин ядигар шейэрин ва савкьатрин “Кавказдин устадар” интернет-туьквендин иесидиз, “Минеральный цин чешмеяр” ООО-дин иесидиз, мярекат кьиле тухвай Гьамзат Наврузоваз, “Ягненок” таверна тешкилнавай Руслан Рустамоваз, лезги фу гьазурзавай карханадин векилриз, видеооператор Илгьам Тагьирмирзоеваз, “Лацу лотос” фондунин регьбер Рустам Гьамидоваз.
“ЛЕКИ” фондунив мергьяматлувилин куьмек яз пулдин такьатар Россиядин вири пипIерай агакьна. Чна ихьтин мярекатрик къуьн кутазвай вири ксарилай рикIин сидкьидай разивал къалурзава”, — лугьузва Инстаграммда “ЛЕКИ” фондунин официальный сайтда чка ганвай малуматда.
«Лезги газет»
