12-августдиз РД-дин хуьруьн майишатдин ва суьрсетдин министр Керимхан Абасова агьалияр кьабулна. Идан гьакъиндай “Лезги газетдиз” министерстводин пресс-къуллугъди хабар гана.
Гуьруьшда министрдин меслятчи Шамил Мегьамедова хуьрерин мулкар дурумлудаказ еримлу авунин ва майишат кьиле тухунин гъвечIи жуьрейрин къурулушрин управленидин начальник Абзагьир Гьуьсейнова, малдарвал еримлу авунин отделдин начальник Юсуф Юсуфова, правовой отделдин начальникдин заместитель Руслан Агьмедова, чилиз талукь алакъайрин отделдин ва гъвечIи карчивилин, уьзуьмчивилин ва багъманчивилин субъектар еримлу авунин отделдин векилри иштиракна.
Гуьруьшдиз атанвай агьалийри кIвалахдик сифте яз экечIзавай фермерар патал кардик квай программайрин сергьятра аваз государстводи грантралди куьмек гунин, хизанрин малдарвилин фермаяр вилик тухунин, гьакIни хуьрерин чкайра жегьил хизанрин яшайишдин кIвалерин шартIар хъсанарунин месэлаяр къарагъарна.
Кьилди къачуртIа, Агъул райондин Чирагърин хуьряй тир фермер Омар Абакарова министрдивай вичин майишат вилик тухун патал грант къачунин карда куьмек гун тIалабна. Аграрийди республикадин дережада аваз кьиле тухузвай грантралди куьмек гунин конкурсда вичивай гьич сакIани гъалибвал къазанмишиз жезвач лугьуз наразивал къалурна.
И месэладиз баян гайи РД-дин Минсельхозпромдин талукь тир управленидин руководитель Абзагьир Гьуьсейнова Омар Абакарова къарагъарзавай месэладин гъавурда вич лап хъсандиз авайди къейдна ва фермердиз грант къачун патал лазим тир документар вахтунда ва дуьзгуьндаказ туькIуьрунин патахъай къайгъу чIугун меслят къалурна. Управленидин начальникди алава хъувурвал, Омар Абакаровавай, гьакIни республикадин хуьруьн майишатдин продукция гьасилзавай маса ксаривай грантралди куьмек гунин месэлайрай Минсельхозпроддин пешекарривай меслятар къачуз жеда. Абзагьир Гьуьсейнова фермердиз арза кхьей чIавуз вичи лазим тир меслятар къалурдайди, министрди лагьайтIа, Агъул райондин руководителривай чкадал справкаяр туькIуьрунин карда куьмек гун тIалабдайди хиве кьуна.
Керимхан Абасова Рутул райондай тир Ватандин ЧIехи дяведин ветеран Ибрагьимпаша Садикьован хизандиз грант къачунин карда куьмек гунин месэла вичин кьетIен гуьзчивилик кутуна.
“Ватандин ЧIехи дяведа иштирак авур чи ватандашрин кьегьалвал неинки 9-майдиз, гьакI амай йикъарани рикIел хуьн чи виридан буржи я. ГьакI хьайила, Ибрагьимпаша Султановичан тIалабун кьетIенди я. Чна адаз чарасуз яз куьмек гун лазим я”, — къейдна министрди.
Унцукул райондин Гимри хуьруьн агьали Мегьамед Абдулаева террасайрин къайдада лежбервал кьиле тухунин къайдаяр гуьнгуьна хтунин карда куьмек гун тIалабна. Ада виликдай хуьре бандитрин яракьлу, законсуз тешкилатрин векилрин аксивал алудунихъ галаз алакъалу яз кьиле фейи вакъиаярни рикIел хкана, алай вахтунда гьалар пайгардик акат хъувунвайди, гьакIни чкадин агьалийриз террасайрин къайдада уьзуьмлухар кухтаз кIанзавайди къейдна.
Керимхан Абасова Гимри хуьруьн аграрийриз лазим кьадар чубукар ва къелемар чара авунин, гьакIни террасаяр гьазурдай чIавуз жедай харжияр мелиорация вилик тухунин программадин сергьятда аваз арадал хкунин месэладиз килигунин тапшуругъ гана.
Министрдин патав Къаякент хуьряй атай Исламутдин Алибегова “Каякентское” ГУП-дин руководстводин кIвалахдай кьил акъудун тIалабна. Адан гафаралди, карханадин дирекция Къаякент районда хуьруьн майишатдин метлеб авай чилер законсуздаказ кьунал машгъул жез им сад лагьай йис туш. Идалайни гъейри, ГУП-дин руководителди хсусиятдиз элкъуьрнавай чилерал гьич са кIвалахни тухузвач.
И месэладай баян гайи РД-дин Минсельхозпроддин правовой отделдин векил Руслан Агьмедова къейд авурвал, винидихъ тIвар кьунвай ГУП-дихъ галаз алакъалу яз арадал атанвай гьалар гуьзчивилик ква. Кьилди къачуртIа, кархана силисдин органри ахтармишай чIавуз 48 миллион манатдин пулар вара-зара авунвайди дуьздал акъуднава. Идахъ галаз алакъалу яз уголовный дело къарагъардайвал я.
Вичин нубатдай яз Керимхан Абасова алава хъувурвал, и агьвалатдай кьил акъудун патал махсус комиссия тешкилда ва ам Къаякент райондиз рекье твада.
Къейд авун лазим я хьи, агьалийрилай атай вири 17 арзани министрди вичин гуьзчивилик кутунва.
«Лезги газет»
