Са тIимил йикъар идалай вилик Махачкъалада, къумукьрин А.Салаватован тIварунихъ галай муздрамтеатрдин зал­да, “Макьам” ансамблдин концерт кьиле фена. Дагъустандин госфилармониядик акатзавай и ансамбль 2018-йисан июлдиз тешкилна. Алатнавай са куьруь вахтунда ада, Москвада, Санкт-Петербургда, Нальчикда, Сочида кьиле фейи фестивалра иштиракуналди, гьакIни Москвадин П.И.Чайковскийдин тIварунихъ галай консерваторияда международный “Дустар кIватIзава” фестивалдин сергьятра аваз кьиле фейи “Усадьба Jazz” конкурсдин лауреат (2019-йис) хьуналди, вичикай хабар гана… Мукьвара меркезда кьиле тухвайди “Макьам”  ансамблдин кьвед лагьай концерт тир. Аниз эвер ганвай мугьманрин арада авай: Гьажи Рамазанов, Самур Эмирбегов (балабан), Гуьлнара Алимова (кьуьл), Ксения Сулейманова (виолончель), Хиринду Султанова, Тельман. Концертда Даггосфилармониядин  солистрини иштиракна…

ТIугъвалдихъ галаз алакъалу яз концертдин залда лазим къайдайрал амал­завайтIани, ам ацIанвай. Шад жедай кар мадни ам тир хьи, аниз Дагъустандин ма­са халкьарин векиларни атанвай. Дугъри­данни, музыкадин алемдихъ мил­ли сер­гьятар авач… “Макьамди” тамамарай гьар са нумра гурлу капар ягъуналди акьал­тIаруни залда ацукьнавайбурув ансам­бл­дин иштиракчийрин дестедивай милли манийралди руьгьдин ем агакьариз хьанвайди субутзавай. Концертдилай кьулухъ чаз ансамблдин художественный руководитель  Шамил  Шерифалиевахъ  галаз суьгьбетдай мумкинвал хьана­.

РикIел хкин: газет кIелзавайбуруз Шамил фадлай таниш я, гьикI хьи, газет­дин чинра ада (ва стха Эльмар Шерифалиева)  къазанмишнавай агалкьунрикай, кьилди къачуртIа, международный ва Вирироссиядин конкурсра къалурай устадвилерикай, лауреат хьуникай чна хабар ганай.

Ш.Шерифалиеван  ери-бине  Ахце­гьай я. Ам 1990-йисуз Махачкъалада дидедиз хьана. Готфрид Гьасанован тIва­ру­нихъ галай музыкадин училище, Даггосуниверситет (психологиядин ва философиядин факультет) куьтягьна. Наль­чик­да Кеферпатан Кавказдин Государстводин искусствойрин институтда чирвилер къачун давамарна, цIи ана ма­гистратура акьалтIарзава. Ам Дагъус­тандин халкьдин алатрин Госоркестрдин, Даггосфилармониядин солист я. 2016-йисалай цIи­нин эвелдалди ада манийринни кьуьлерин “Дагъустан” Гос­ансамблдиз регьбервал гана. Алай вахтунда ада “Лезгинка” ансамблда зегьмет чIугвазва.

“Макьам” ансамблдик кваз Шамила тар язава. Ансамблдик кваз Гьажи Саидова (гитара), Гульнара Гьайдаровади (флейта ва туьтег) ва Эльмар Шерифалиева (далдам, кахон, куркурар галай тафт — бубен) чпин устадвал къалурзава. Репертуардик лагьайтIа, Дагъустандин халкьарин манияр ва чи республикадин, гьакI дуьньядин машгьур композиторрин эсерарни ква.

Москвадин П.И.Чайковскийдин тIва­рунихъ галай консерваториядин Рагьманинован залда 2007- йисалай инихъ гьар йисуз кьиле тухузвай международный “Дустар кIватIзава” фестивалдикай рахадайла, Ш.Шерифалиева къейд авурвал, августдин вацра тешкилзавай и мя­ре­кат, дугъриданни, музыкадал рикI алай ксар патал еке сувариз элкъвезва. Адан макьсад общественностдин гегьенш къатар музыкадин рекьяй дуьньядин халкьарихъ авай адетрихъ ва и хиле къачунвай цIийи камарихъ галаз танишарун я. Алатнавай йисара дуьньядин музыкадин алемда машгьур вишералди ксар фестивалдин иштиракчияр хьана. Ина дуьнь­ядин жуьреба-жуьре уьлквейрай тир музыкантри классикадин, фольклордин ва джаздин музыкадин вечерар, яратмишунрин гуьруьшар тешкилзава. Фестивалда иштиракай “Макьам” ансамблдин, “Зи Да­гъустан” тIвар алаз, концертдин къайдада туькIуьрна­вай программадик Дагъларин уьлкведин халкьарин фольклордин манияр ва машгьур  композиторрин  эсерар квай. Мадни программадин сергьятра аваз чи республикадин машгьур чкайрикай, халкьарин музыкадин девлетлу тарихдикайни суьгьбетарна. Фестивалдин тешкилатчияр чи республикадин иштиракчийрин программадилай рази яз амукьнай. Залда ацукьнавайбуру чи устадрин алакьунри чеб гьейранарнавайди  абурун тIварарихъ хуш келимаяр лугьуналди къалурнай.

Умудлу я, милли музыка хуьник еке пай кутазвай “Макьам” ансамблдихъ ри­кIел аламукьдай, чи республикадин тIвар мадни машгьурдай мярекатра зурба агалкьунар гележегдани гзаф жеда.

Рагнеда  Рамалданова