Аялрин къугъунриз (асул гьисабдай столдал къугъвадайбур (настольные игры) талукь проект гъиле кьун фадлай чи фи­кирдик квай. И карда виридалайни четин месэлайрикай сад хъсан шикилар чIугвадай художник жагъу­рун тир. Къугъунра милливал, адетрин кьетIен­вал хуьн художникди арадал гъизвай суьретрилай аслу жезвай. Нетижада заз ахьтин касни жагъана ва чун санал кIвалахдивни эгечIна.

Интернетдин куьмекдалди чна къугъунрин игитрал алукI­дай милли парталрин, гьерекатар кьиле физвай майдан эвездай халичайрин чешнеярни жагъурна. Сифте нубатда чна дарги чIа­лал “Элиас” тIвар алай къугъун таржума авуна гьазурна. Мукьвара гьа и къугъун лезги ва авар чIаларални гьазур жеда.

Лагьана кIанда, чи проектдихъ милли чIалар хуьнин жи­гьет­дай еке метлеб ава. Малум тир­вал, аялар жуьреба-жуьре къугъунрал машгъул жезва. Къу­гъунар милли тах квайбур ва хайи чIаларал арадал гъанвайбур хьайила, аяларни гъвечIи чIа­валай дидед чIалал рикI алаз чIехи жеда. Яни проектдин куьмекдалди акьалтзавай несилар руьгьдин ивирриз мукьва жезва.

Гьелбетда, аялар хайи чIа­лал рикI алаз чIехи ийидай маса рекьерни ава. Мисал яз, ктабрин куьмекдалди. Амма къугъунрикай ва я тахьайтIа мультфильмайрикай и жигьетдай менфят гзаф жезва. Малум тирвал, аял чIаван виридалайни рикI алай кеспияр къугъунарни мультфильмайриз килигун я.

Чна Дагъустандин халкьарин чIалариз машгьур хьанвай къугъунар таржума ийизва. Дарги чIалал гьазурнавай “Элиас” къугъун маса гун патал интернетдиз акъуднава. “Элиас”-дал гьам гъвечIибурувай, гьамни чIехибу­рувай къугъваз жеда. Къугъун 50 картадикай ибарат я. Гьар са картадал таржумани галаз 8 гаф кхьенва. Абурун куьмекдалди аялриз жуьреба-жуьре затIарин тIварар хайи чIалал гьикI ятIа чир жезва.

Чи проектдикай Инстаграмда кардик квай  @ethnic_games чинай кIе­лиз жеда.

Абдур-Рагьман  Исмаилов