Алай йисан 2-ноябрдиз Дагъустандин Кьил Сергей Меликова «Дагъустан Республикада миллетрин арада ислягьвал ва разивал» тIвар алаз кьиле фейи республикадин конференцияда иштиракна.
Меркездин Дуствилин кIвале кьиле фейи мярекатда жемиятдин, диндин, жегьилрин, жуьреба-жуьре организацийрин векилар, активистар, журналистар кIватI хьанвай.
Конференцияда Дагъустандин жемиятдик и йикъара секинсузвал кутур вакъиайриз талукь веревирдер авуна. Гьа гьисабдай яз Махачкъаладин аэропортуна арадал атай гьерекатрикай, Палестинадинни Израилдин арада кьиле физвай чуьруькди кIеве тунвай инсанриз куьмек гуникай, Дагъустанда миллетрин ва динрин векилрин арада ислягьвал хуьникай, Дагъустандин жегьилриз дуьзгуьн тербия гуникай.
Аэропортуна арадал атай вакъиайриз баянар гудайла, Сергей Меликова мад сеферда и месэладин гьакъиндай Дагъустандин спортсменри социальный сетра арадал гъайи рахунрин тереф хвена. Гьа са вахтунда ада дагъустанвийрин менталитет чин тийиз абуруз жуьреба-жуьре къиметар гузвай ксаризни ачухдиз жавабар гана.
«Чи гьуьрметлу спортсменри аэропортуна къайдасузвилер арадал гъайибурун гъавурда акьун ва абуруз а кар багъишламишун герек тирдакай чпин фикирар лагьана. За абуруз жаваб гана. Абур чпи а карда иштирак тавур месэладин гьакъиндай залукриз элкъуьрун виже къведач. Квез я ихьтин рахунар гьуьжетар?» — жаваб гана региондин Кьили.
Дагъустанда кьиле физвай маса вакъиайриз талукь яз баянар гудайла, республикадин регьберди лагьана: «Дагъустанда садрани тахьай, дагъустанвийрин менталитет чин тийизвай, виш йисаралди дагъустанвияр фейи четин уламрикай, рекьерикай хабар авачир инсанри чаз къиметар гана кIандач».
Палестинадин халкьдин кьилел атай бедбахтвилиз талукь яз, Сергей Меликова республикади адаз гузвай куьмекдикай лагьана. Мергьяматлувилин и кIвалах Дагъустандин муфтиятдихъ галаз санал кьиле тухузва.
«Виликамаз тайинарнавайвал, чна кьве хиляй кIвалахзава. Сад лагьайдак муфтият ва мискIинар акатзава. Анра палестинвийриз куьмек гунин гьакъиндай ийизвай дуьаяр сад тир Аллагьдив фад агакьда. Терминал кукIваруналди ваъ. Кьвед лагьайдак мергьяматлувилин куьмек акатзава. Заз малумат ганвайвал, мергьяматлувилин фондари ва агьалийрини кIватIнавай пулунин кьадар 90 миллион манатдив агакьзава. Кар алайди и пулунихъ герек затIар маса къачун ва Палестинадиз агакьарун я. МЧС-ди кьве самолет чара авунвай. Амма дяведин гьерекатар кьиле физвай чкадиз самолетар ахъайзавач. Гьавиляй и месэла четиндаз элкъвенва. Рекье твазвай куьмекдин парар Египетдин военный базайра туникайни бажагьат файда жеда. Абур палестинвийрив агакь тавунни мумкин я», — къейдна региондин Кьили.
Дагъустандин муфтий, шейх Агьмад Афандидини вичин фикир лагьана: «Чна миллетрин ва динрин арада тафават твазвач, виридав чун гьуьрметлувилелди эгечIзава. Вучиз лагьайтIа, чи пайгъамбарди чаз гьакI меслятна.
Арадал атай хьтин вакъиайрив къайгъусузвилелди эгечIун лазим туш. Аэропортуниз фейи жегьилар са нин ятIани аялар, хтулар, мукьвабур тир. Хьайи кIвалахар кьулухъ элкъуьризни хъжедач. Амма мад сеферда ихьтин татугай крар тахьун патал жегьилрин арада гъавурдик кутунин кIвалах тухун лазим къвезва. Зун чIалахъ я, чина вири крар хъсан жеда. Вучиз лагьайтIа, дагъустанвияр ислягь халкь я».
Хийир Эмиров
