6-ноябрдиз Чеперин хуьруьн агьалийри (администрациядин кьил — Багъир Забитов) дяведин махсус серенжемдин иштиракчийриз таза як рекье тун тешкилна. Мергьяматлувилин и мярекатда РФ-дин Игит Энвер Набиева, Багъир Забитова, райондин собранидин депутат Ярагьмед Гуьлагьмедова ва масабуру иштиракна.
Хуьруьн жемят яшайишдин шартIарилай рази я. Тик ятIани, асантдиз гъвечIи машинар физ-хквезвай рехъ, гьич чир техжервал цIийи хъувуна, тарифлудаказ тадаракламишнавай школа, бинедилай ремонт хъувунвай мискIин, гьар са кIвале хъвадай михьи яд, гьамам, тIебии газ, телевизор, интернет, мобильный телефондин алакъа – шегьерда хьтин къулайвилер ава. Михьи гьава, булахар, мал-хеб хуьдай баркаван яйлахар, гуьзел тIебиат… Гьавиляй патара авай са шумуд чепивиди хтана, ина чпин бубайрин куьгьне кIвалер туькIуьр хъийизва. Кьве хизанди цIийи кIвалер эцигзава…
– Душмандиз, кьиле США аваз, НАТО-дин саки вири уьлквейри куьмекзаватIани, абуруз хийир авач. Вучиз лагьайтIа, хайи ватандин азадвални аслу туширвал патал чIугвазвай чи женг гьахълуди я. Чи гадайри дяведа игитвилин чешнеяр къалурзава. И йикъара зун Москвада Фрунзедин тIварунихъ галай военный академиядик экечIнава. Мумкинвал аваз, ингье, хайи хуьруьн жемятдин хийир-шийирдикайни хкечIзавач…,– лугьузва Энвер Альбертовича.
– Зун 10-класс куьтягьна хуьряй экъечIай кас я, — ихтилатзава игитдин буба Альберт Набиева. – Каспийск шегьерда кIвал-югъ кутуна, Дагъустанда, Чечняда ва масанра дяведин объектрин эцигунрал кIвалахна, гила пенсияда ава. Энвераз ина кIвал эцигдай чил чара авунва. Аллагьди гайитIа, ам эцигна бегьем хьайила, зазни хайи хуьруьз хкведай фикир ава…
– Багъир стха, СВО-дин иштиракзавай аскерриз як рекье тунин месэла гьикI арадал атана? – хабар кьазва чна Б.Забитовавай.
– И хъсан кардик кьил кутурди Ахцегь райондин регьбер Абдул-Керим Палчаев я. Чнани, хипехъанвилел машгъул майишатрини, адан тереф хвена. Чна 1,5 тонн михьи як Луганскда женг чIугвазвай чи аскерриз рекье твазва. Иник «Булах» КФХ-дин председатель Темир Белагъаева, «Хизан» СПК-дин председатель Аким Ризаева, вичин хци СВО-да къуллугъзавай Араз Адильханова ва Абдул-Керим Палчаева чпин пай кутунва. Къейд ийин, алай вахтунда чи хуьряй 100-лай виниз жегьилри СВО-да гъиле яракь аваз къуллугъзава. Гьайиф хьи, хкатунарни ава: Забитов Рафик, Лачинов Фахрудин ва Велиханов Мегьамед телеф хьанва. Абурун экуь къаматар чи рикIера гьамишалугъ яз амукьда.
Дашдемир Шерифалиев
