Меркезда – сифте яз
Махачкъалада 2023-йисан эхирдалди ахтармишунин гьалда аваз сад лагьай сефер яз гьакъидихъ тир муниципальный парковка (машинар акъвазардай чка) кардик кутада. Идакай «Дагъустандин экономика» телеграм-каналди хабар гузва.
Къейдзавайвал, машинар акъвазардай чкадин майдан саки 6 агъзур квадратдин метрдикай ибарат жеда. Гьа са вахтунда мулкунал, санлай къачурла, автомобилар акъвазардай 492 чка арадал гъида.
И проект маса шегьеррилай чешне къачуналди уьмуьрдиз кечирмишзавайди я. ГьакIни хабар гузвайвал, парковка ахтармишунин гьалда (тестовый режим) са вацра кардик кутада. И кар кьилиз акъудун патал адан майдан герек тир тадаракралди таъминарда.
Идалайни гъейри, машин акъвазардай чкадай гьакъи гун патал махсус мобильный приложение ва сайт туькIуьрнава. Парковкадай гудай гьакъини гьисаба кьунва, виликамаз кьунвай делилралди, адан къимет са сятдай 50 манат жеда.
Чешмедин гафаралди, эгер и проект агалкьунралди кьилиз акъатайтIа, мумкин я, шегьерда ихьтин чкаяр мадни артухарун. Серенжем нетижалу тирди, сифте нубатда, шегьердин рекьерал ацалтзавай машинрин пар тIимил ва автомобилрин гьерекат артух хьуни къалурда, и делилди шегьерда улакьрихъ галаз алакъалу месэладиз хъсан патахъай таъсирда.
5,2 процентдин артух хьанва
Кура-кура алишверишда гъиле къекъвезвай пулдин кьадар Дагъустанда 9 вацран къене 5,2 процентдин артух хьанва. ИкI, 2023-йисан сифтегьан пуд кварталда и рекъем 568,8 миллиард манатдив агакьнава. Идакай чкадин госстатистикадин органдал асаслу яз, «Дагъустандин экономика» телеграм-каналди хабар гузва.
Чешмеди кхьизвайвал, гьа са вахтунда кафейра, ресторанра гъиле къекъвезвай пулдин кьадар 4,3 процентдин гзаф хьанва ва, кьилди къачуртIа, и рекъем 75,3 миллиард манатдиз барабар я.
Агьалияр куьчарун патал
Дагъустанда чIуру гьалда авай кIвалера яшамиш жезвай агьалияр куьчардай 12 мертебадин комплекс эцигун патал пудратчи хкязава, хабар гузва «Дагъустандин экономика» телеграм-каналди.
Чешмедин делилралди, пудратчиди 519 миллион манатдихъ 2024-йисан эхирдалди са этапда аваз 51 агъзур квадратдин метрдикай ибарат майдандилай тIимил тушиз кьакьан мертебайрин кIвалерин комплекс хкажун лазим я.
И серенжемар патал 4,3 гектардикай ибарат чил чара авунва, нетижада куьчарзавай агьалияр патал 257 квартира арадал къведа. Санлай къачурла, виликамаз кьунвай рекъемдалди, и кIвалериз 1,8 агъзур агьали куьчарда.
И кIвалахар кьилиз акъудун патал пулдин такьатар федеральный ва региондин бюджетрай чара авунва.
Пудан са пай
Аналитикри уьлкведин кьиблепатан регионра квартираяр маса гунин кар ахтармишнава. Малум хьайивал, СКФО-да эцигзавай кIвалера виридалайни гзаф Ставрополдин крайда (31 процент) ва Дагъустанда (33 процент) квартираяр маса къачузва.
Къейдзавайвал, Дагъустанда эцигзавай объектрин пудан са пай маса ганва ва адан кьадар 139 агъзур квадратдин метрдиз барабар я. Санлай къачурла, и объектрин майданрин умуми кьадар 416 агъзур квадратдин метрдикай ибарат я.
Са лишандик кваз
Дагъустандин метягьар сад тир бренддик кваз маса гуда. ИкI, Роспатентди «Дагъустандин суьрсет» тIвар алай алишверишдин лишан регистрация авунва. Идакайни винидихъ тIвар кьунвай чешмеди хабар гузва.
И серенжемди Дагъустан ерилу ва экологиядин жигьетдай михьи суьрсет авай регион тирди тестикьарзава.
РД-дин ветеринариядин Комитетдин делилралди, арза ганвай ксариз абурун метягьар «Дагъустандин суьрсет» бренддихъ галаз кьазвайди тестикьарзавай 270 сертификат ганва.
Артух хьун вилив хуьзва
2023-йисуз Дагъустандин майишатри хурмайрин бегьердин кьадар 5,5 агъзур тонндив кьван артухарун пландик кутунва, хабар гузва «Дагъустандин экономика» телеграм-каналди.
Къейдзавайвал, алатай йисуз республикада хурмайрин бегьер 5 агъзур тонндив агакьнавай. ИкI, алай йисуз адан кьадар 10 процентдин гзаф хьун мумкин я.
Чешмеди кхьизвайвал, Дагъустанда хурмайрин багълар 360 гектардикай ибарат мулкунал, кьуд районда экIя хьанва: Мегьарамдхуьруьн районда (227 гектардилай виниз), Дербент районда (100 гектардилай виниз), Къумторкъала районда (20 гектар) ва СтIал Сулейманан районда (10 гектар).
ГьакIни къейдзавайвал, 2023-йисуз «Полоса» ООО-ди 5 гектардикай ибарат мулкунал хурмадин багъ кутунва.
Гьазурайди — Муса Агьмедов
