Дагъустан Республикадин Кьил Сергей Меликова 2023-йисан 19-январдиз кьабулай къарардин бинедаллаз СтIал Сулейманан райондин Алкьвадрин юкьван школадин муаллим Агъамирзе Агъамирзоеваз, Сардархуьруьн юкьван школадин муаллим Темирхан Темирхановаз ва ЦIийи поселокдин юкьван школадин муаллим Марина Ягъибеговадиз “Дагъустан Республикадин лайихлу муаллим” лагьай гьуьрметдин тIвар гана.
Пуд муаллимни чаз фадлай хъсандиз танишбур я. Чи къенин суьгьбет Марина Ягъибеговадикай я.
Марина 1964-йисан 12-декабрдиз машгьур алимар, шаирар акъатай Алкьвадрин хуьре Магьмуд ва Ракъуят Эфендиеврин хизанда дидедиз хьана. Ракъуята колхозда, гуьгъуьнлай “Алкадарский” совхозда яргъал йисара намуслудаказ зегьмет чIугуна. Саки 60 йисуз республикадин “Коммунист” (гилан “Лезги газет”) ва райондин “Коммунизмдин гатфар” (гилан “Куьредин хабарар”) газетрин мухбир хьайи шаир Магьмуд Эфендиеван тIвар райондилай яргъарани машгьур тир. Гьа ихьтин диде-бубадивай тербия, насигьатар къачур Марина муаллимди къе вич бахтлу инсан яз гьисабзава. И бахтлувални адаз вичи лугьузвайвал, виридалайни гьуьрметлубурукай сад тир муаллимвилин пешедин иеси хьунай, тамам 33 йисуз цIудралди гадаярни рушар уьмуьрдин шегьредал акъудунай, и кар давамарунай аквазва.
5-классдал кьван Маринади Алкьвадрин юкьван школада кIелна, 6-классдилай 10-классдал кьван Дагъустандин Огни шегьердин дагъви рушарин школа-интернатда.
Школа-интернат лап хъсан къиметар аваз акьалтIарай руш Дагъустандин госуниверситетдин математикадин факультетдик экечIна.
1987-йисуз ДГУ акьалтIарай жегьил пешекарди вичин зегьметдин рехъ Къаякент райондин Усмикент хуьруьн юкьван школада математикадин тарсар гузвай муаллимвилелай башламишна. Ана кIвалахай 3 йисуз Марина Ягъибеговади гьам школадин коллективдин, гьамни хуьруьнвийрин патай гьуьрмет къазанмишна.
1993-йисалай 1995-йисалди Марина Магьмудовнади СтIал Сулейманан райондин ЦIийи поселокдин юкьван школада старший пионервожатый яз кIвалахна. 1995-йисалай инихъ и мектебда математикадин тарсар гузва.
— Марина Магьмудовна неинки ада кIвалахзавай школада ва чи районда, гьакIни Кьиблепатан Дагъустанда математикадин лап хъсан муаллимрикай сад я, — лугьузва райондин образованидин управленидин начальник Гьуьсейн Шихбабаева. — Адахъ кIвалахда гьар йисуз хъсан нетижаярни жезва. Им, са рахунни алачиз, адан рикI муаллимвилин пешедал, аялрал хьунин нетижа я. Марина муаллимдин кIвалахдилай чун гзаф рази я.
КIвалахда кIвенкIвечи, цIийи къайдаяр ишлемишзавай Марина Магьмудовнади тарсар гузвай аялри гьар йисуз райондин ва республикадин школьникрин олимпиадайра кIвенкIвечи чкаяр кьазва. ИкI, М.Ягъибеговади чкадин, Вирироссиядин школьникрин, республикадин “Пифагор” (2018-2019-йисар), Леонард Эйлеран тIварунихъ галай региондин паюнин (2020-йис) олимпиадайрин, “Ученик года-2021” республикадин конкурсдин гъалибчияр ва призерар гьазурна. Шамил Тагьирова райондин, республикадин ва Вирироссиядин са шумуд олимпиадада гъалибвал къачуна. Олимпиадайрин ва конкурсрин гъалибчиярни призерар гьазурунай муаллимдиз грамотаяр ганва.
Гьа са вахтунда М. Ягъибеговади математикадин, физикадин, информатикадин муаллимрин объединенидин руководителвилин везифаярни намуслудаказ кьилиз акъудзава. Ам 5-классдин руководителни я. 20 аялди кIелзавай и класс гьар са рекьяй школада чешне я.
Марина Магьмудовнади тарсар гайи гадайрикайни рушарикай къе хъсан пешекарар хьанва. Ада математикадал ашукьарай Марина Мукаиловади алай вахтунда Цмуррин юкьван школада математикадин тарсар гузва.
Эхиримжи йисара вичин виликан ученикар хьайи 8 касди алай вахтунда республикадин ва уьлкведин кесерлу вузра кIелунални Марина Магьмудовнади дамахзава.
М. Ягъибеговадин яргъал йисарин бегьерлу ва гьакъисагъ зегьмет 2008-йисуз “Россиядин Федерациядин умуми образованидин гьуьрметлу работник” тIвар, 2021-йисуз Дагъустан Республикадин образованидин ва илимдин министерстводин премия, са кьадар грамотаяр гуналди къейднава.
Тежрибалу муаллим хьиз, Марина Магьмудовна низамлу ва ферли 3 веледдин диде, 4 хтулдин бадени я. Адан веледар тир Таисади ДГУ-дин социальный факультет, Марата политехнический институт, Эльдара юридический колледж акьалтIарна, чпин пешейрай кIвалахзава.
“Дагъустан Республикадин лайихлу муаллим” гьуьрметдин тIвар мубарак авуналди, чаз Марина Магьмудовна Ягъибеговадихъ муаллимвилин четин, амма гьуьрметлу кIвалахда мадни еке агалкьунар хьана кIанзава.
Хазран Кьасумов
