Къулайвал патал

Россиядин Яшайишдин фондунин (СФР) Дагъустанда авай Отделенидин пресс-къуллугъди хабар гузвайвал, алай йисан алатнавай са варзни зуран вахтунда инин “тади зенгинин нумрадиз” 20 агъзурдалай гзаф зенгер атанва. Чи ватанэгьлийрилай “аялрин пуларин” (сад тир пособидин, дидевилин капиталдин…), гьакIни пенсийриз ва вахтуналди кIвалахиз тахьуниз талукь месэлайрай суалар гзафни-гзаф къвезва…

РикIел хкин: телефондин 8 800 6000 317 нумрадиз зенг ­авуналди, дагъустанвийривай чпик къалабулух кутазвай суалар гуз жезва, абур садни фикир тагана тазвач. Мадни СФР-дин Дагъус­танда авай Отделенидин сайтда шегьерра ва районра кардик квай муьштерийрихъ галаз кIвалахдай къуллугъдин идарадиз  фин патал виликамаз учир кьаз ва электронный арза гуз жезва.

ТIвар кьунвай чешмедин делилралди, 2020-йисан апрелдин юкьварилай чи уьлкведа дидевилин (хизандин) капиталдин сертификатар цIийи къайдада (проактивно), яни яшайишдин хилен къуллугъар кьилиз акъудзавай идарайриз тефена (арза тагана), къачудай мумкинвал хьанва. И жуьреда абур 2 миллионни 300 агъзурдалай виниз агьалийрив агакьнава. Абурукай 60 агъзур кьван дагъустанвияр я. И къайдада дидедивай ханвай аял патал СНИЛС къачузни жезва.

Малум тирвал, электронный документар ПФР-дин (гила — СФР) официальный сайтда (www.pfr.gov.ru)  ва “Госкъуллугъар” порталда (www.gosuslugi.ru)  дидедин “Личный кабинетдиз” хкведа, абур вахчуз винидихъ тIварар кьунвай идарайриз финин лазимвал авач. Гьа и жуьреда, яни “Личный кабинетда” арза гуналди, диде-бубадивай дидевилин капиталдин такьатрикай менфят къачуз ва абурун амай кьадар чириз жезва.

РикIел хкин: 2023-йисан 1-февралдилай дидевилин капиталдин кьадар сад лагьай аял патал 586 947 манат я. 2020-йисан 1-ян­вардилай инихъ, сад лагьай аял хьайила, эгер хизандиз серти­фикат ганватIа, кьвед лагьай аялдиз капитал 188 682 манатдин кьадарда хгуда.

Проактивный къайдадин макьсад агьалийрив къуллугъар регьятдаказ ва яргъал тевгьена агакьарун я.

Махсус такьатар

2023-йисан январдилай здравоохраненидин сифтегьан звенодин, центральный, районрин ва участокрин азарханайрин, гьакIни “Тади куьмекдин”  станцийра ва отделенийра кIвалах­завай работникар патал яшайишдин цIийи выплата тайинарнава. Адан кьадар 4,5 агъзурдалай 18,5 агъзурдав агакьзава.

Тайинарнавай цIийи выплата медицинадин работникдин категориядилай ва медидарадин жуьредилай аслу я.

Россиядин Яшайишдин фондунин Дагъустан Республикада авай Отделенидин малуматдалди, къенин юкъуз цIийи выплата Дагъустанда 500 касдив (4 миллиондилай виниз кьадарда аваз) агакьнава (вири санлай чи уьлкведа — 2,500 касдив, 21,4 миллион манатдин кьадарда аваз).

Дагъустандин Яшайишдин фондунай чун мадни гъавурда турвал, медработникриз цIийи выплата къачун патал документар гьазурунин ва я арза гунин  лазимвал авач (пулар автома­тически ракъурда). Медицинадин идарайри анра кIвалахзавай, чпиз и пул гун лазим тир ксарин электронный реестр (ам гьахъ-гьисаб кьазвай вацран кIвалахдин 10 йикъалай геж тушиз гун лазим я) Яшайишдин фондуниз ракъурзава. Абур рекье турдалай кьулухъ 7 йикъан вахтунда медработникрив пулар агакьун герек я.

Электронный  сертификат

СФР-дин Дагъустанда авай Отделенидин пресс-къуллугъди мадни хабар гузвайвал, электронный сертификатдин бинедаллаз алай вахтунда протезринни ортопедиядин алатарни гьазуриз жезва.

Яшайишдин фондунин кьилин везифайрикай садни кьезилвилер авай категорийрин агьалияр патал реабилитациядин тадаракар (технические средства, ТСР) ва къуллугъар агакьарун я. Алатай йисан нетижайриз килигна, и рекье фондуни харжнавай такьатри 367 миилион манатдилай виниз тешкилзава. ИкI, сагъламвилин  мумкинвилер сергьятламиш хьанвай ксар патал 5 миллион манатдин къимет авай тадаракар ганва (электронный сертификатдин гьисабдай ганвайбур ва  компенсациярни кваз). Кьилди электронный сертификатдин бинедаллаз 590 касдив, санлай къачурла, 15 миллион манатдин къимет авай тадаракар агакьна.

РикIел хкин: электронный сертификатдин бинедаллаз реабилитациядин тадаракар 2021-йисалай инихъ къачузва. Кьилиндини инсанриз чпиз лазим тадарак къачудай  мумкинвал хьун я.

Рагнеда Рамалданова