Дагъустанвийривай хайи чIаларин международный сувариз талукьарнавай конкурсда иштиракиз жеда
Алай йисан 13-февралдилай дуьньядин халкьарин хайи чIалар хуьз куьмек гузвай “Ата-бубайрин чIал” фондуни адетдиз элкъвенвай мярекат — Хайи чIаларин международный йикъахъ галаз алакъалу авунвай “Ата-бубайрин чIал” конкурс (ам яргъал мензилда аваз, яни онлайн-къайдада тешкилнава) вад лагьай сеферда кьиле тухузва.
Хайи чIаларин международный югъ, 2000-йисалай башламишна, гьар йисан 21-февралдиз къейдзава. Адан макьсад чIаларин ва адетрин, культурайрин жуьреба-жуьревал хуьн ва и месэладал инсанрин фикир желб авун я. Конкурсдин бинеда аялрин ва жегьилрин арада дидед чIалар машгьур авун, гьакIни хайи чIала-рин муаллимрин кIвалахдик гьевес кутун ава.
“Ата-бубайрин чIал” конкурсда 3 йисалай 22 йисал кьван яшда авай аялривай ва жегьилривай иштиракиз жеда. Номинацияр агъадихъ галайбур я: хайи чIалал эсерар таъсирлудаказ кIелун (шиирар ва проза); халкьдин сивин яратмишунрин бинедаллаз литературадинни авазрин композицияр (махар, хкетар, балладаяр); халкьдин художественный яратмишунар (милли къайдайралди туькIуьрнавай безекар); хайи чIалал эссе; халкьдин милли парталар алаз янавай шикил; “Зи тухум халкьдин тарихда” проектдин презентация.
Конкурсдин материалар 2023-йисан 13-февралдилай 15-мартдалди кьабулда. Тамам делилар “Ата-бубайрин чIал” фондунин сайтдай — www.ypredkov.ru — жагъуриз жеда. Къейд ийин, гъалибчийрин яратмишунарни и сайтда чапда.
«Лезги газет»
