Чи базарра, туьквенра, хуьруьн майишатдин амай продуктар хьиз, помидорарни бул я. Виликдай къецепатан уьлквейрай гъиз хьайи помидорар эхиримжи йисара чкадал гьасилзавай, экологиядин жигьетдай михьи помидорралди эвез хьанва. И кардал агьалийри разивални ийизва.
Са шумуд йис я Сулейман-Стальский районда помидорар теплицайрин майишатра гьасилиз. Ида агьалияр йиса кьиляй-кьилиз таза, дадлу, экологиядин жигьетдай михьи продукциядалди таъминардай мумкинвал гузва.
Алай вахтунда районда теплицайрин 13 майишат кардик ква. Санлай къачурла, абуру 10 гектардив агакьна майдан кьунва.
Теплицайра помидорар ва салан маса майваяр гьасилунал гьам хуьруьн майишатдин карханаяр (ООО-яр, КФХ-яр), гьам кьилдин ксар (ЛПХ-яр, арендаторар) машгъул жезва.
Майвачивал менфятлу хел я. Гьавиляй районда помидорар ва салан маса майваяр (афнияр, келемар, истивутар…) теплицайрин майишатра гьасилун патал инвестиционный проектарни кардик кутунва, инвестордихъ районда теплицайрин чIехи комплекс эцигдай фикирни ава.
Лагьана кIанда, районда салан майваяр неинки теплицайрин майишатра, гьакIни ачух майданрани гьасилзава. И кардал ДаркIушрин, Чуьхверхуьруьн, ЦIийи Макьарин, Эминхуьруьн, Герейханован ва маса хуьрерин агьалияр фадлай машгъул я. Агьалийри салан майваяр чпин кIвалерихъ галай салара, гьакIни арендадин участокра гьасилзава.
Салара помидорар агакьнава, алай вахтунда абур кIватI хъийизва. Чпин хизанрин хсуси игьтияжриз ишлемишунихъ галаз санал, агьалийри помидорар муьштерийриз масани гузва.
Алатай йисуз районда 29172 тонн салан майваяр кIватI хъувунай. Пешекарри кьунвай гьисабралди, алай йисуз 30000 тонндилай тIимил тушиз салан майваяр кIватI хъийида.
Хазран Кьасумов
