Ахтармишун патал гъиле кьунвай “Михьи шегьер” ва “Михьи район” проектар уьмуьрдиз куьчуьрмишзавай тегьер веревирдна и йикъара видеконференциядин алакъадин (ВКС) жуьреда кьиле тухвай совещанидал РД-дин Гьукуматдин Председателдин заместитель Абдулмуслим Абдулмуслимова. РикIел хкин, производстводин ва агьалийри ишлемишзавай шейэрин амукьаяр нетижалудаказ кIватIун ва тергун тешкилун патал гъиле кьунвай “Михьи шегьер” ва “Михьи район” проектар Каспийскда, Дербентда, гьакIни Мегьарамдхуьруьн, Сулейман-Стальский ва Хасавюрт районра уьмуьрдиз куьчуьрмишзава.
Совещание ачухдайла, вице-премьерди къейд авурвал, къенин юкъуз и проектриз талукь яз виридалайни виниз тир гьазурлухвал Каспийскдиз ава. Шегьерда кIвалахар 90 процентдин тамамарнава. Вири майданар гьазурнава, зирзибил вегьедай къапар маса къачунва. Дербентда рекьерин картада къалурнавай серенжемар графикдин бинедаллаз тамамарзава. Алай вахтунда ана экопунктар тайинардай чкаяр къалурнава. Хасавюрт районда администрацияди авун лазим тир вири кIвалахар тамамарнава, куьчейра зирзибил вегьедай къапар эцигдай, гуьзгуь, чарар ва пластик кьилди-кьилди кIватIдай чкаяр тайинарнава. Идалайни гъейри, хуьрерин мулкар зирзибилдикай михьдай генеральный схема туькIуьрнава.
Чкайрал арадал атанвай гьаларикай РД-дин тIебиатдин ресурсрин ва экологиядин министрдин везифаяр вахтуналди тамамарзавай Заур Римиханова хабар гана. ИкI, адан гафаралди, Каспийскда 6 аукцион малумарнава, кьенятнавай такьатрин пай контейнерар эцигдай алава чкаяр туькIуьруниз харжда.
“Каспийскда ва Дербентда куьчейра эцигдай зирзибил вегьедай цIийи къапар, шуьше, пластик кIватIдай сеткадин чанахъар маса къачунва. Дербентда контейнеррин майданар туькIуьрнава ва тадаракламишнава.
Хасавюрт районда “Михьи район” проект нетижалудаказ уьмуьрдиз куьчуьрмишзава. Пландик зирзибил вегьедай чанахъар эцигдай 519 майдан туькIуьрун ква. Абур РД-дин хуьруьн майишатдин ва недай суьрсетдин министерстводин “Хуьрерин чкаяр вири патарихъай виликди тухун” программадик ква», — малумарна З.Римиханова.
Абдулмуслим Абдулмуслимова къейд авурвал, ахтармишун патал гъиле кьунвай “Михьи шегьер” ва “Михьи район” проектри, санлай къачурла, чпин нетижалувал къалурна. Идахъ галаз алакъалу яз, ада республикадин маса районрин ва шегьеррин руководителриз и кIвалахдик активнидаказ экечIуниз эвер гана.
Гуьгъуьнлай кьиле тухузвай кIвалахрин гьакъиндай Каспийскдин кьилин везифаяр вахтуналди тамамарзавай Загьирбег Таибова доклад авуна. Ада къейд авурвал, шегьерда малумарай 6 аукционни хьанва. Абурун куьмекдалди хкягъай вири контейнерар, чанахъар тамамдаказ агакьарнава. Фикирда кьунвай 101 майданни, къенин йикъан делилралди, тамамдаказ туькIуьрнава. Идалайни гъейри, гьар жуьредин зирзибил кьилди-кьилди кIватIун патал куьчейра эцигдай ракьукай раснавай къапарни маса къачунва, кIвалах къайдада тунва. Проект уьмуьрдиз куьчуьрмишунихъ галаз алакъалу четин месэлаяр, малум хьайивал, Каспийскда авач. З.Таибова инанмишарайвал, майданар тайинарнавай вахтунда ишлемишиз башламишда.
Вице-премьерди контейнерар эцигдай майданар туькIуьрунин кIвалах куьтягьун тапшурмишна ва абур ишлемишиз вахкун патал тайинарнавай эхиримжи вахт 2020-йисан сентябрь тирди рикIел хкана.
Гуьгъуьнлай доклад Мегьарамдхуьруьн райондин кьил Фарид Агьмедова авуна. Адан гафаралди, райондин мулкунал зирзибил чараз кIватIдай комплекс эцигун патал кьве участок чара авунва. Абурукай садан майдан 1 гектардиз, кьвед лагьайдан – 2 гектардиз барабар я. «Райондин хуьрер зирзибилдикай михьун патал генеральный схема туькIуьрнава ва тайинарнава, законсуздаказ арадал гъанвай хъуртар алай чилер михьи хъувунва. ГьакIни ахтармишун патал гъиле кьунвай проект уьмуьрдиз куьчуьрмишунин месэлайрал машгъул жедай пешекаррин десте арадал гъанва, проектдиз талукь Рекьерин карта туькIуьрнава ва тестикьарнава, — лагьана ада.
Хасавюрт районда лазим кIвалахар, муниципальный райондин кьилин везифаяр вахтуналди тамамарзавай Багьаудин Мамаева къейд авурвал, тайинарнавай вахтунал амал авуна кьиле тухузва.
Совещанидал гьакIни РД-дин хуьруьн майишатдин ва недай суьрсетдин министерстводин “Хуьрерин чкаяр вири патарихъай виликди тухун” программадикайни рахана. ИкI, Абзагьир Гьуьсейнова хабар гайивал, конкурсдин бинедаллаз хкягъунин кIвалах 18 районда кьиле физва. “Вири проектрин санлай къачур къимет 184 миллион манатдиз барабар я. 122 миллион манатдин арзаяр ганва, 93 миллион манат государстводин патай куьмек яз агакьарда. Пул хуьрериз фида. Идахъ галаз алакъалу яз, за конкурсдал разивал гайи районриз аутсорсингдин къайдада хуьрерин администрацийриз тулкIдин ва маса къачунин месэлаяр дуьздаказ гьялунин карда куьмек гун теклифзава”, — лагьана ада.
Чи мухбир
