13-февралдиз “Михьи гьаят — михьи намус” лишандик кваз Дагъустан Республикадин вири районрани шегьерра кьиле фейи субботникдивай белижвиярни къерехда акъвазнач. Мярекатда чlехи классра кlелзавай аялри, муаллимри ва бязи агьалийри иштиракна.
Поселокда кардик квай школайри чпин мулкарал алай зирзибил кlватlна, михьивилер авуна. Мектебрин къвалав гвай куьчейрай кьурай хилер, баклажкаяр, пакетар, путулкаяр ва маса зирзибил кlватlна.
Г.Лезгинцеван тlварунихъ галай школадин коллективди, райондин управленидин образованидин начальникдин везифаяр тамамарзавай Эрик Ибрагьимован тапшуругъдалди поселокдин сурара авай зирзибилни кlватlна, михьивилер авуна. Сурар пак чка, ана михьивал хуьн гьар садан буржийрикай я. Гьайиф хьи, бязибуру ихьтин къайдайрал амалзавач. Сурара кlвалахай аялриз ва муаллимриз суваб хьана.
Поселокдин кьил Рамиз Гьабибулаева ва школайрин директорри субботникда активнидаказ иштиракайбуруз сагърай лагьана.
Къагьриман Ибрагьимов
