Саки 60 йисуз шофервиле кIвалахай яшар 85 йис хьанватIани, къени хсуси “Жигулидин” рулдихъ ацукьнавай кьасумхуьруьнви Велимет Керимович Керимовахъ галаз зун и йикъара гуьруьшмиш хьана. Зегьметдин ветеранди гьахълудаказ лугьунни ийида: “Зун чархарал алаз физвай уьмуьрдин сагьиб я”.
Ам 1936-йисуз Кьасумхуьрел дидедиз хьана. ГъвечIи чIавалай техникадал рикI алай гада Кьасумхуьруьн 1-нумрадин юкьван школадин 9-классда кIелзавай вахтунда райвоенкоматдай шофервилин пешекарвал къачун патал автошколада кIелиз 6 вацран курсариз рекье туна. Анаг акьалтIарай жегьил вичин хивевай буржи кьилиз акъудун патал Советрин Армиядин жергейриз фена. Белоруссияда къуллугъ авур адакай ана саперрин батальондин, гуьгъуьнлайни частунин командирдин шофер хьана.
Зегьметдин рехъ В.Керимова 1952-йисуз Кьасумхуьруьн консервиярдай заводда рабочийвилелай башламишна. Хкягъай пешедай руьгьдин таъминвал жагъай ада 1955-йисалай жуьреба-жуьре маркайрин автомашинрал кIвалахна. 1959-1964-йисара адакай Махачкъала шегьерда якIунни некIедин промышленностдин управленидин 6-нумрадин АТК-дин шофер хьана. 1964-йисан майдин вацралай, 1991-йисуз пенсиядиз фидалди, Велимет Керимовича “Рычал-су” заводда кIвалахна. Анжах тек са и заводда ада 27 йисуз, галатун тийижиз, зегьмет чIугуна.
Гзаф мукьуфлу, умун къилихрин, вичин хивевай жавабдарвал дериндай аннамишдай намуслу инсан ва хъсан пешекар тир адал четин рейсериз, яргъал шегьерриз фин, углекислый газ хкун, “Рычал-су” ятар тухун, гьакIни жавабдар маса кIвалахар тапшурмишиз хьана. Ада кIвалахзавай вири и йисара ам фейи кьван рекьерин сан кьун четин я.
Вичин гзаф йисарин намуслу зегьметдалди коллективра, хуьруьнвийрин арада лайихлу гьуьрмет къазанмишнавай производстводин кIвенкIвечи Велимет Керимович 2 сеферда райсоветдин ва кьве сефердани Кьасумхуьруьн советдин депутатвиле хкяна. Адан шикил гзаф йисара чи райондин ва гьакIни республикадин недай-хъвадай шейэрин промышленностдин министерстводин Гьуьрметдин доскада хьана. Производстводин кIвенкIвечидиз 1972-йисуз райисполкомдай, 1982-йисузни недай-хъвадай шейэрин промышленностдин министерстводай “Жигули” автомашин чара авунай.
В.Керимован гзаф йисарин намуслу зегьмет гьукуматдин са жерге наградайралди ва къиметлу савкьатралди къейднава. ИкI, 1973-йисуз соцсоревнованидин гъалибчи хьайи адакай гуьгъуьнлай 10 ва 11-пятилеткайрин зарбачини хьана. 1981-йисуз адаз Зегьметдин Баркаллувилин орден ва 1988-йисузни “Зегьметдин ветеран” медаль гана. Гьеле армияда амаз КПСС-дин членвиле кандидат, 1958-йисуз КПСС-дин членвиле кьабулай ада, девирар, гзаф инсанар дегиш жезватIани, къенин юкъузни Коммунистрин партиядиз ва адан идеалриз вичин вафалувал хуьзва. “Инсандихъ са чин ва са рикI хьун лазим я”, — гьахълудаказ лугьузва партиядин ва зегьметдин ветеранди. Ам Октябрдин революциядин 90 йисан юбилейдин медалдин сагьибни я.
Саки 55 йисуз санал яшамиш хьайи, райвоенкоматда, КГБ-дин райотделенида кIвалахай уьмуьрдин юлдаш, белорус дишегьли Баранкова Тамара Александровнадихъ галаз санал абуру веледар халис ватанпересар яз чIехи авуна. Абурукай 3-дахъ — кьилин, садахъ юкьван пешекарвилин образование ава.
14 хтулдин, 7 птулдин чIехи буба тир Велимет Керимовичан рикI абурукай архайин я. Дуьз лагьайтIа, ада, вичелай чешне къалуруналди, веледар гъвечIи чIавалай зегьметдал рикI алаз тербияламишна, намуслувилелди яшамиш жез чирна.
— Алай вахтар гьикьван муракаббур ятIани, эхиримжи йисара районда хъсанвилихъ жезвай дегишвилери, муниципальный райондин кьил Н.Абдулмуталибован чалишмишвилери, гзафбурун хьиз, зи рикIизни теселли гузва, чи гележег хъсан жедайдахъ инанмишвал артухарзава, — лугьузва ветеранди. — Къуй чи балайрин гележег бахтлуди хьурай, райондин ад мадни хкаж хьурай!
Хазран Кьасумов