ЦIийиз ачухай спортдин мектебда Кьиблепатан Дагъустандин районрин спортсменрин арада азаддиз кьуршахар кьунай сад лагьай турнирни кьиле фена. Спорткомплекс ачухунин шад мярекатрин сергьятра аваз тешкилай акъажунра Докъузпара, Ахцегь, Хив ва Сулейман-Стальский районрай, 42, 50, 58, 65, 69 килограммдин заланвилин дережайрин 120 кьван спортсменди иштиракна.   

Спортдин, жегьилрин сиясатдин ва туризмдин рекьяй райондин отделди, райондин спортдин мектебри тешкилай акъажунрин кьилин макьсадар Кьиблепатан Дагъустанда спортдин и жуьре вилик тухун, машгьур авун, спортсменрин арада дуствилин алакъаяр мягькемарун ва абурун устадвал хкажун я.

Къизгъин гьалара кьиле фейи акъажунрин нетижада, командайрин умуми агалкьунриз килигна къимет гайила, сад лагьай чкадал Докъузпарадин команда хьана. Кьвед лагьай чка Сулейман-Сталький ва пуд лагьай чкани Ахцегь районри кьуна. Хив райондин спортсменрин команда кьуд лагьай чкадал хьана.

Чпин заланвилин дережайра гъалиб хьайибуз, хъсан чкаяр кьурбуруз грамотаяр, медалар ва пулдин пишкешар гана.

Къейд ийин, агалкьунар хьайи спортсменриз шабагьар гунин шад мярекатда хсуси инвестор Шагьлар Бухсаева, жемиятдин хатасузвилин рекьяй Докъузпара райондин кьилин заместитель Къазихан Мегьединова, райондин спортдин, жегьилрин сиясатдин ва туризмдин отделдин начальник Агъашериф Агъаширинова, ЦIийи Къаракуьре хуьруьн ДЮСШ-дин директор Амудер Шихмурадова ва Ахцегьрин ДЮСШ-дин директор Марсель Гьажиева иштиракна.

«Лезги газет»