Алай йисан эхирра Россияда 1997-йисан чешнедин 10 манатдин чарар чап ийиз башламиш хъийида. РикIел хкин, и кар 2013-йисалай акъвазарнай. Идакай, “Известия” газетдиз интервью гудайла, Центробанкдин председателдин заместитель Сергей Белова хабар гана.
Адан гафаралди, идахъ галаз сад хьиз, 1998-йисалай инихъ мад басма тавур 5 манатдин чарар акъудиз башламиш хъувунин месэлани веревирдзава.
“2000-йисарин сифте кьиляй чарарин и пул агьалийри активнидаказ ишлемишиз хьанай, амма еке игьтияж авай абур фад куьгьне хьана. Гьаниз килигна, абур ракьун пулуналди эвезунин къарар кьабулнай. Гьелбетда, ракьун пул акъудуниз ийизвай харжияр, чарчинбурув гекъигайла, гзаф я, амма, ракьун пул яргъал вахтунда ишлемишиз хьун себеб яз,санлай къачурла, и кар хийирлуди хьана. Исятда технологияр дегиш хьанва. Месела, чарчин банкнотадиз лак ягъиз жезва. Ида лагьайтIа, абур ишлемишдай вахт гьатта 30 процентдин артухарзава. И делил чна кьиле тухвай ахтармишунри субутарнава. Лак ягъунин технология ахтармишна куьтягьнава, чна адаз тамамдаказ ихтибарзава ва гележегдин кIвалахда ишлемишда”, — хабар гана Центробанкдин векилди.
Ада гьакIни малумарайвал, 2009-йисалай инихъ ракьун къимет виле акьадайвал багьа хьанва. Гьаниз килигна, ракьун “10 манатар” акъудун са кьадардин харжияр алай кардиз элкъвенва.
“Гьаниз килигна, чна чарчин “10 манатар” акъудиз башламиш хъувун метлеб авай кар яз гьисабзава”, — къейдна С.Белова. Гьа са вахтунда ада гъавурда турвал, 5 ва 10 манатдин ракьун пулар чарчинбуралди тамамдаказ эвезуникай ихтилат физвач: кьве жуьредин пулни агьалийрин гъилера жеда.
Чи мухбир
