9-июлдиз “Кьурагь район” МО-дин администрациядин заседанийрин залда райондин администрациядин кьилин заместитель Махач Хариеван регьбервилик кваз райондин идарайрин ва организацийрин руководителрин совещание кьиле фена. Ам алатай гьафтедин кIвалахдин нетижайриз ва вилик акъвазнавай везифайриз талукьарнавайди тир. Идан гьакъиндай “Лезги газетдиз” муниципалитетдин администрациядин пресс-къуллугъдай хабар гана.
Совещанидал рахай администрациядин хуьруьн майишатдин ва чилиз талукь алакъайрин отделдин пешекар Нариман Мисриева къейд авурвал, “майишатра бегьер кIватI хъувунин ва хуьруьн майишатдин маса кIвалахар къайдадик кваз кьиле физва. Къацар хкатнавай чкайра абур списатуниз талукь актар туькIуьрун герек я. И кар патал хьанвай зиян тайинарунин мураддалди чкайрал фена кIанда”.
Образованидин отделдин начальник Рамазан Катибова райондин чирвилер гудай идарайра цIийи кIелунин йисаз гьазурвал акун патал ремонтдин кIвалахар кьиле тухузвай гьалдин патахъай хабардарна.
“Образованидин идараяр цIийи кIелунин йисаз гьазурзавай гьал 1-августдилай махсус комиссияди ахтармишиз башламишда. Райондин школайра кIелай 6 ученикдивай Мегьарамдхуьруьн райондин Бут-Къазмайрин юкьван школада ЕГЭ кьвед лагьай сефердани вахкуз хьанач, абуруз юкьван школа акьалтIарнавайвилин гьакъиндай аттестатар гудач. Шаз юкьван школа куьтягьнавайвилин гьакъиндай документар 7 ученикдив агакьнач”, къейдна Р.Катибова.
Райондин центральный больницадин духтур Султанмажид Моллаева стационарда залан азарлуяр авачирдан ва и мукьвара ЦРБ-дин вири къурулушар РД-дин Минздравдин пешекарри ахтармишайдан гьакъиндай малумат гана. “Ахтармишунрин нетижаяр августдиз Кьурагьрин хуьре РД-дин минздравдин коллегиядал веревирдда”, — къейдна С.Моллаева.
Экономикадин ва эменнидиз талукь алакъайрин отделдин начальник Идрис Муслимова районда вири жуьрейрин налогар кIватIунин план 130 процентдин тамамарнавайдан гьакъиндай малумарна.
Совещанидин кIвалахдин нетижаяр кьур Махач Хариева райцентрадал алай булахра хъвадай яд авачирдакай райондин прокурорди, телефондай пудра зенгна, хабар гайидакай лагьана.
“Булахра яд тахьунин себеб ам бязи ксари чпин кIвалерин вилик квай багълар, салар дигун патал ишлемишун я. Абур жавабдарвилиз чIугун патал серенжемар кьабулзавач”, — малумарна “Кьурагьрин ЖКХ” МУП-дин директор Мурад Османова.
Чи мухбир
