9-июлдиз Махачкъаладин Советский райондин судди гьукумдин векилдин намусдик хкIадай гьерекатар авунай ва гуж ишлемишунай тахсир кутазвай Дагъустандин меркездин виликан мэр Муса Мусаеван хва Бадрудин Мусаев 2 йисни 5 вацра дустагъна. Азадвиликай магьрум авунилай гъейри, судди адал 30 агъзур манатдин кьадарда аваз жермени илитIна.

Тахсир кутазвай терефди Мусаев 5 йисуз дустагъ ва 30 агъзур манат жерме авун истемишзавай. Адвокатди лагьайтIа, суддивай Бадрудин Мусаев тахсир квачирди яз малумарун тIалабзавай.

Къейд ийин хьи, Бадрудин Мусаев вич суддин залда авачир. Ам розыскдиз малумардайвал я.

РикIел хкин, 2017-йисан сентябрдин вацра гьа и судди Бадрудин Мусаев адак тахсир кутазвай вири рекьерай михьиди тирди тестикьарзавай къарар кьабулнай. Гуьгъуьнлай и къарар РД-дин Верховный судди къуватдай вегьена.

Бадрудин Мусаев суд-дуванрик гьикI акатнай? Гьеле 2016-йисан майдин вацра Махачкъалада Расул Гьамзатован ва Ярагъ Мегьамедан тIварарихъ галай куьчейрин къекъуьндал меркездин виликан мэрдин хцин ва полицейскийдин арада чуьруьк арадал атана. Силисдин делилралди, машиндин рулдихъ ацукьнавай Мусаева, рекьерин гьерекатрин къайдаяр чIурна ва гуьгъуьнлай амни са гада авай машин акъвазарай полицейскийрихъ галаз къалмакъал акъудна.

Чи мухбир