И йикъара Дагъустандин образование еримлу авунин институтда (ДИРО) мектебра, ссузра ва вузра кIелзавай аялрин ва жегьилрин тербиядин месэлайриз талукь яз кьиле фейи конференцияда республикадин муниципалитетрай тир 186 муаллимди иштиракна. Идакай РД-дин образованидин ва илимдин министерстводи хабар гузва.
ДИРО-дин ректордин везифаяр вахтуналди тамамарзавай Гуьльнара Агьмедовади къейд авурвал, Махачкъаладин 51-нумрадин лицейда мукьвара хьайи мусибатдин дуьшуьш мектебра тербия гунин кIвалах жавабдарсузвилелди тухунин нетижа я.
“Пис аялар жедайди туш, жедайди пис тамамарзавай кIвалах я”, — къейдна мярекатдал рахай ДИРО-дин пешекар Гуьлжан Тажудиновади. Ада психологди четин аялрихъ галаз тухузвай кIвалахдин кьетIенвилериз талукь доклад авуна.
Аялар тербияламишунин карда руьгьдинни эдебдин, ахлакьдин месэлайрикай ДГИ-дин теологиядин факультетдин декан Саида Сиражудинова рахана.
“Образованидин хиле государстводини динди санал кIвалахуни Россиядин алай аямдин жемият руьгьдинни эдебдин рекьяй еримлуди хьунин карда важиблу роль къугъвазва”, — лагьана ада.
Мярекатдин сергьятра аваз муаллимри кIелзавай аялрин хатасузвилин, абурун арада экстремизмдин фикирар чукIун тавун патал РД-дин муфтиятди районрин образованидин управленийрихъ галаз алакъаяр хуьнин месэлаяр веревирдна.
Чи мухбир
