1,4 миллиард манат харжда
Дагъустанди хъуьтIуьз гьазурвал акунин серенжемриз 1,4 миллиард манат харжда, алатай йисав гекъигайла, им 13 процентдин гзаф я. 2022-йисуз абуруз 1,3 миллиард манат харжнай. Идакай РД-дин эцигунрин, архитектурадин ва ЖКХ-дин министерстводин пресс-къуллугъди хабар гузва.
Ведомствода къейд авурвал, сентябрдин сад лагьай декададин нетижайралди, регион мукьва жезвай мекьивилериз 78 процентдин гьазур хьанва. Республикадин муниципалитетра яшайишдин фондунин 10,4 миллион квадратный метрдикай ибарат майдан, 370-далай виниз къазанханаяр, чимивал гудай центральный пунктар хъуьтIуьз гьазурнава, гьакIни саки 230 километрдин кьадарда коммунальный сетар цIийикIа туькIуьр хъувунва. Гьа са вахтунда 91 миллион манатдин къиметдик квай материалринни техникадин запас арадал гъанва.
Министерстводин пресс-къуллугъдин векилди гьакIни къейд авурвал, са жерге муниципалитетар зулунни хъуьтIуьн муддатдиз гьазурвилер акунин карда са тIимил кьулухъ галамукьнава. Абурун арада Махачкъала, Каспийск ва Буйнакск шегьерар ава.
Кьадар тIимиларнава
Дагъустанди 2023-йисан сифтегьан зур йисуз нафт хкудунин кар — 18 процентдин, газ хкудунин 9 процентдин тIимиларнава. Идакай республикадин энергетикадин ва тарифрин министерстводин пресс-къуллугъди хабар гузва.
ИкI, январь-июнь варцара, санлай къачурла, хкуднавай нафтIадин кьадар 33,2 агъзур тонндиз ва газдин кьадар 44,7 миллион куб метрдиз барабар я. 2022-йисуз и рекъемар 44,4 агъзур тонндиз (нафт) ва 48,9 миллион куб метрдиз (газ) барабар тир.
2021-йисан сад лагьай паюна республикада 50,7 агъзур тонн нафт ва 51,6 миллион куб метр газ хкуднай.
Министерстводин пресс-къуллугъдин векилди къейд авурвал, и затIар хкудун тIимил хьун са шумуд себебдихъ галаз алакъалу я. Кьилин себеб ихьтинди я: геологоразведкадин кIвалахриз ахъайзавай пулдин такьатрин кьадар тIимиларунин нетижада цIийи буругърин къуяр кардик кутазвач.
Маса вахтунал хутахнава
Махачкъалада гужлувал 12 МВт-дикай ибарат гарун электростанция эцигунин кIвалах 2024-йисал хутахнава. Идакай РД-дин энергетикадин ва тарифрин министерстводин пресс-къуллугъди хабар гузва.
Сифтедай ам эцигунин кIвалах 2023-йисан гатуз башламишун фикирда кьунвай. Амма инвесторри чпелай аслу тушир са бязи манийвилер пайда хьуникди и кар маса вахтунал хутахдай къарар кьабулна.
Гьа са вахтунда проектдин параметрияр дегиш хьанвач. Проект уьмуьрдиз кечирмишунин къимет 1,5 миллиард манатдиз барабар я.
ЦIийи духтурханаяр
Махачкъала ва Хасавюрт шегьерра аялрин цIийи духтурханаяр эцигун пландик кутунва. Идакай РД-дин здравоохраненидин министерстводин телеграм-каналди хабар гузва.
Къейдзавайвал, региондин премьер-министрди республикадин здравоохраненидин министерстводиз Хасавюрт шегьерда ва районда аялрин цIийи духтурхана арадал гъунин гьакъиндай эцигунрин проектдин гьахъ-гьисаб гьазурунин тапшуругъ ганва. ЦIийи идара эцигунин игьтияж авайди тестикьарзавай тел федеральный здравоохраненидин министерстводиз ракъурун фикирдиз къачунва.
ГьакIни чешмеда хабар гузвайвал, Махачкъалада аялрин цIийи духтурхана эцигуниз талукь тир гьахъ-гьисабар кьуна акьалтIарнава. Алай вахтунда проектдин документация гьазурун патал икьрарриз талукь кIвалахар кьиле тухузва.
Баянар гана
Махачкъаладин аэропортунин директорди авиабилетрин къиметар багьа хьунин гьакъиндай баянар гана.
ИкI, карханадин генеральный директор Саид Рамазанова къейд авурвал, Махачкъаладин аэропорт билетар маса гунал машгъул жезвайди туш, им «тухузвайбуру» (перевозчики) кьилиз акъудзавай кар я.
Ада къейд авурвал, Махачкъаладин аэропортунай гьар юкъуз Москвадиз 20 авиарейс авун пландик ква. И рекье авайни авачир тек са конкурент Минеральные воды шегьер я, аниз 21 рейс физва.
Къиметрикай рахайтIа, Махачкъала — Москва маршрутда къимет 24 агъзур манатдиз барабар я, Грозный шегьердай 31 агъзур манатдай «лув гуз» жеда. Пака Махачкъаладай Москвадиз фидай самолетдин билет 17 агъзур манатдай акъвазда. Виридалайни ужуз билет 15 агъзур манатдай я, адалай ужузди авач. Минеральные воды шегьердай физвай рейсерин къиметар Махачкъаладин къиметар хьиз я (и кьве шегьердин арада 800 километр мензилдин тафават аватIани).
Гьазурайди – Муса Агьмедов
