Алатай гьафтеда, Дагъустандин халкьарин садвилин йикъан­ вилик, Махачкъалада, Къумукьрин театрдин дараматда­, «Чун са­н­алди — Россия» лишан­дик кваз, международный ва Вирироссия­дин конкурсрин ла­уре­ат Мадина Шагьмурадовадин мер­гьяматлувилин концерт кьи­ле фена. Ана къазанмишай пулдин такьатар алай вахтунда Украинада кьиле физвай дяведин махсус серенжемдин иштиракчийрин ва абурун хизанриз куьмекар гудай фондуниз рекье туна.

Мадина Шагьмурадовади тамамарай манийрихъ галаз сад хьиз, республикадин са жерге коллективри ва артистри чпин алакьунар къалурай концерт, дугъриданни, рикIи кужумдай манийралди девлетлуди тир. Кьилди къачуртIа, абурун жергеда авай: РД-дин халкьдин артист Новруз­ Шагьбазова регьбервал гузвай Дагъустандин халкьдин алат­рин госоркестр, Т.Мурадован тIвар­цIихъ галай Даггосфилармониядин (дирижёр — РФ-дин лайихлу­ артистка Зарифа Абдуллаева) камерный оркестр, Дагъустандин­ халкьдин артистар тир Лариса Гьажиева, Рукъият Гьамзатова, Зульфия Ильясова, Пирдаус­ Камалова, Абдула Мегьамедмирза­ев, Дагъус­тандин операдинни балетдин гостеатрдин манидарар ва хор, манийринни кьуьлерин «Да­гъустан» тIвар алай госансамбль ва ма­сабур.

И мукьвара дидедиз хайидалай инихъ 100 йис тамам хьанвай Расул Гьамзатован, Россиядин ва къецепатан композиторрин, гьакI Дагъларин уьлкведин милли чIаларал тамамарай манийри кIватI хьанвайбурун гуьгьуьлар шадарна.

Дербентдин музучилищедин муаллим Наиля Шагьмурадовади­ тамамарай «Зи Дагъустан» (чIа­лар кхьейди — Шагь-Эмир Мурадов, музыка — Э.Ибрагьимова) манини вирида хушдаказ кьабулна.

РикIел хкин, М.Шагьмурадова РД-дин искусствойрин лайихлу де­ятель, композитор, Дербентдин­ музучилищеда яргъал йисара зегьмет чIугвазвай ва анин халкьдин музалатрин оркестрдиз регьбервал гузвай Насир Бубае­вичан хизанда дидедиз хьана. Мадина­ди Дербентдин музучили­ще, Астрахандин госконсерватория акьал­тIарна, алай вахтунда магистратурада кIелзава. Зегьметдин рехъ Мадинади 2008-йисуз хайи шегьерда искусствойрин 3-нумрадин школада фортепианодай муаллим яз кIвалахунилай башламишна. Гуьгъуьнлай Дербентдин педколледжда, шегьердин 9-нумрадин СОШ-да кIвалахна. 2013-йисалай инихъ ам манийрин­ ва кьуьлерин «Дагъустан» госан­­самблдин, гьакI Дагъустандин опе­радинни балетдин гостеатрдин хордин манидар я. Ам Махачкъа­ладин жегьилрин парламентдин­, «Сад тир Россия» партиядин член, «Каспий», «СелиАС», «Машук» форумрин иштиракчи я.

Мадина Насировна хейлин кон­курсрин, гьа гьисабдай яз «Свободное Отечество» международный конкурсдин, «Лезги сес» манидин конкурс-фестивалдин 1-дережадин лауреатвилин тIварарин, Сочида музыкадин искусстводай кьиле фейи Вирироссиядин ачух конкурсдин, Париж, Волгоград ва маса шегьерра — международный конкурс-фестивалрин 2 ва 3-дережайрин лауреат, хейлин дипломрин ва гьуьрметдин грамотайрин сагьиб я.

Къейд авун лазим я хьи, Мадина Шагьмурадовади Дагъустан Республикада дуствал мягькемаруник, миллетрин ва динрин арада меслятвал, Дагъларин уьлкведин этнокультурадин жуьреба-жуьревал хуьникни пай кутазва. СВО-дин иштиракчияр ва абурун хизанар патал мергьяматлувилин къанунралди концерт тешкилунни тариф авуниз лайихлу кар я. Къуй бажарагълу чи таватдин алакьунри чун инлай кьулухъни шадаррай!

Рагнеда Рамалданова