И йикъара Сулейман-Стальский райондин администрацияда райондин кьил Н.Абдулмуталибован регьбервилик кваз кьиле фейи махсус совещанидал райондин образованидин идараяр цIийи кIелунин йисаз гьазур хьунин месэлайриз килигна.

«Лезги газетдиз» райадминистрациядин пресс-къуллугъди хабар гузвайвал, совещанида райодин кьилин заместителри, райондин идарайрин жавабдар къуллугъчийри, образованидин идарайрин руководителри ва масабуру иштиракна.

Райондин мектебар цIийи кIелунин йисаз гьазур хьунин кIвалахар кьиле физвай гьалдикай образованидин управленидин начальникдин везифаяр тамамарзавай Гь.Шихбабаева ихтилатна. Ада къейд авурвал, тайинарнавай графикдал асаслу яз, алай вахтунда вири мектебра ремонтдин кIвалахар кьиле физва. Малумарайвал, райондин ругуд мектебда медкабинетар кардик акатда. РД-дин кьилин «150 мектеб» проектдин сергьятра аваз вад мектебда ремонтдин кIвалахар башламишнава.

Эхирдай райондин кьил Н.Абдулмуталибова къейд авурвал, республикадин кьиле авайбуру яшайишдин сиясатдиз, гьа жергедай яз образованидин месэлайризни еке фикир гузва. «2015-йисалди районда 10 мектеб ва 5 аялрин бахча эцигда. Мектебрин материалринни техникадин гьалар хъсанарун – им образованидин идарайрин кьиле авайбурун важиблу месэла я. И жигьетдай чунни куьмек гуз гьазур я», — лагьана райондин регьберди.

«Лезги газет»