29-июлдиз Кьурагь райондин администрациядин заседанийрин залда райондин кьил Замир Азизова гьафтедин кIвалахрин нетижаяр кьунин гьакъиндай райондин идарайринни тешкилатрин жавабдар къуллугъчийрихъ галаз нубатдин совещание кьиле тухвана. Идакай «Лезги газетдиз» райондин администрациядин пресс-къуллугъди хабар гузва.

Налогрин къуллугъдин инспектор Секинат Къарахановади малумарайвал, гьар гьафтедин саласа юкъуз налогар кIватIунин серенжем кьиле тухузва. КIири, Моллакент ва КьепIир хуьрера гьафтеда 98 агъзур манат налогар кIватIнава. 23 агъзур манат улакьрин налогни кIватIнава. Районда чилин налогар алай вахтунда 50 процентдин кIватIнава. Налогрин жигьетдай Штул, Кьуьчхуьр, Шимихуьр ва Хпуькь хуьрерик буржар кума. Пешекарди къейд авурвал, кьилдин ксаривай улакьрин налогар кIватIунин карда четинвилерни арадал къвезва.

Райондин ЖКХ-дин идарадин директор М.Османова зирзибилар кIватIунин ва тухунин гьакъиндай Дербентда кьиле фейи совещанидал хьайи ихтилатрикай хабар гана.

Райондин 23-нумрадин ДЭП-дин кьилин инженердин везифаяр тамамарзавай А.Къазиева рекьерин къуллугъдин къуллугъчийриз икьван чIавалди гуз тахьанвай мажибар хгун хъувурдакай ихтилатна.

Образованидин отделдин начальник Р.Катибова райондин мектебар цIийи кIелунин йисаз гьазур хьунин месэлаяр ахтармишун патал РД-дин образованидинни илимдин министерстводин векил райондиз атайдакай ихтилатна.

Малум хьайивал, образованидин идарайра ремонтдин кIвалахар 75-80 процентдин акьалтIарнава. 12-августдалди вири мектебра ремонтдин кIвалахар куьтягьун чарасуз я.

Совещанидал финансрин отделдин начальник Б.Ибрагьимова, ЦРБ-дин духтур Ж.Рамазанова ва масабуру чпин кIвалахрикай ва авай шартIарикайни мумкинвилерикай баянар гана.

Совещанидин эхирда З.Азизова бязи руководителрин кIвалахрилай наразивал малумарна. Кьилиз акъуд тавунвай крар къведай гьафтедалди тамамар хъувунин тапшуругъ гана.

«Лезги газет»