И йикъара Мегьарамдхуьруьн райондин Бут-Къазмайрин юкьван школада республикадин “Рекьин гьерекатдин къайдаяр хъсан чидайбур” (“Знатоки правил дорожного движения”) конкурсдин сергьятра аваз райондин акъажунар кьиле фена. Абур Каспийск шегьерда кардик квай Республикадин чирвилерин центради тешкилнавай. Мярекатдин макьсад — аялриз велосипед ишлемишунин къайдаяр чирун, адал алаз финин ва рекьера тIарвилерни хасаратвилер тахьана улакьар гьалунин вердишвилер артухарун тир.
Конкурсдин 4 номинацияда (“Яхдиз физвай акьуллуди”, “Велосипед гьалзавай жегьил”, “Тади куьмек”, “Дикъет це, шегьре рехъ”) райондин 11 мектебдин аялри иштиракна. Вири командадиз санлай къачурлани къимет гузвай.
И акъажунра Бут-Къазмайрин школадин “Рекьин патрул” командади 1-чка кьуна. КьепIир-Къазмайрин ва Филерин школайрин командаяр — 2, Мегьарамдхуьруьн 2-нумрадин ва Советский хуьруьн школаяр 3-чкайриз лайихлу хьана.
Кьилдин иштиракчийрин арада хьайи акъажунрани Бут-Къазмайрин школадин аялар тафаватлу хьана. ИкI, “Велосипед гьалзавай жегьил” номинациядай Жафаров Девлета ва Салманов Даира — 1, Мегьдиев Салима -2 ва Давудова Сафинади 3-чкаяр кьуна (жавабдар кас — Гьасанова Камале). “Дикъет це, шегьре рехъ” номинациядай кьилин баллар Алиметова Гуьрчека къазанмишна (жавабдар кас — Салманова Наира). “Тади куьмек” номинациядай командайрин арада “Рекьин патрул” командади 2-чка кьуна (жавабдар муаллимар — Алиметова Снежана ва Гьасанова Тамила).
Нетижайри субутзавайвал, и акъажунра Бут-Къазмайрин школадин аялри чпихъ хъсан чирвилер, вердишвилер ва гьазурвал авайди къалурна. Конкурсдиз мектебдин команда Салманов Балакъардашан регьбервилик кваз гьазур хьана.
Тамила Салманова
