Мергьяматлувал
Алай йисуз Дагъустанда цIийи 15 мектеб ахъайна, абурукай сад – СтIал Сулейманан райондин Агъа СтIал-Къазмайрин хуьре. Лагьана кIанда, и мектеб муниципалитетда чIехибурукай сад я, ана 400-дав агакьна аялриз чирвилер къачудай вири мумкинвилер тешкилнава.
Алай вахтунда мектеб кIелунин, тербия гунин, спортдал машгъул хьунин крара герек къвезвай тадаракралди таъминарун давам жезва. И кардик хайи райондихъ, хуьруьхъ рикI кузвай ватанэгьлийри чпин пайни кутазва. Ахьтинбурун жергейра Дагъустандин Росреестрдин Управленидин регьбер Арсен Пирмегьамедовни ава.
Мукьвара адан буйругъдалди, Управленидин Общественный советдин член, Урусатдин журналистрин Союздин Дагъустанда авай отделенидин ревизиядин комиссиядин председатель Мурад Мегьамедкеримова Агъа СтIал-Къазмайрин мектебдив кIелунра ва спортдал машгъул хьунин карда герек къведай тадаракар агакьарна.
Муаллимрин коллективдихъ ва ина кIелзавай аялрихъ галаз кьиле фейи гуьруьшдал М.Мегьамедкеримова директор Жабраил Аслановав мектебдиз пишкешнавай затIариз талукь сертификат вахкана, муаллимрихъ – кIвалахда, аялрихъни кIелунра агалкьунар хьун алхишна.
Идалайни гъейри, ада яргъал йисара акьалтзавай несилриз дерин чирвилерни тербия гунин карда гьакъисагъвилелди зегьмет чIугвазвай кьве муаллимдив – Артик ва Заинат Исмаиловрив РФ-дин Госдумадин депутат Хизри Абакарован патай Разивилин чарар вахкана.
Вичин нубатда мектеб герек тадаракралди таъминарунин кардик чIехи пай кутунай Жабраил Асланова Арсен Пирмегьамедоваз сагърай лагьана.
Агьмед Магьмудов
