Эхиримжи вахтара Дагъустандин жуьреба-жуьре шегьеррани районра «РикIел хуьнин багъ» лишандик кваз Ватандин ЧIехи дяведин йисара ва Украинада кьиле физвай махсус серенжемда телеф хьайибурун экуь къаматар эбеди авунин мураддалди къелемар цуниз талукьарнавай мярекатар тешкилзава. Мукьвара Урусатдин журналистрин Союздин Дагъустанда авай отделенидини и серенжемдин тереф хвена.
ИкI, 1-ноябрдиз Дагъустанда авай отделенидин ревизиядин комиссиядин председатель, меценат Мурад Мегьамедкеримован куьмекдалди СтIал Сулейманан райондин Агъа СтIалрин ва Агъа СтIал-Къазмайрин мектебрин мулкара 200-дав агакьна туядин къелемар цана.
И мярекатда журналистрин Дагъустанда авай отделенидин председатель, «Лезги газетдин» кьилин редактор Мегьамед Ибрагьимова, ревизиядин комиссиядин председатель Мурад Мегьамедкеримова, райондин, хуьрерин администрацийрин векилри, муниципалитетдин информациядин центрадин къуллугъчийри, директорри ва мектебра кIелзавай аялри иштиракна.
М.Ибрагьимова, «РикIел хуьнин багъ» серенжемдин важиблувиликай рахадайла, адахъ акьалтзавай несилар зегьметдал рикI алаз, ватанпересар яз чIехи авунин жигьетдайни еке метлеб авайди къейдна.
«И серенжемдин асул макьсад чи Ватан, уьлкве патал чанар гайибурун экуь къаматар эбеди авун я. Абур къе чи арада амачтIани, абурун тIварар халкьдин рикIелай садрани алатдач. Алай девир секинди туш, дуьньядин жуьреба-жуьре пипIера дявеяр кьиле физва, телефвилер, магьрумвилер жезва. Къуй абур куьтягь хьурай, дуьньяда ислягьвили агъавалрай», — лагьана ада.
«Лезги газетдин» кьилин редакторди гьакIни СтIал Сулейманан районда и мярекат тешкилун патал пулдин такьатар чара авур агъастIалви М.Мегьамедкеримоваз сагърай лагьана ва мергьяматлувилин, сувабдин крар ийизвай кьегьалрилай чешне къачуниз эвер гана.
Чпин нубатда Агъа СтIалрин ва Агъа СтIал-Къазмайрин мектебрин директорри – Феликс Магьмудовани Жабраил Асланова мектебрин мулкар авадан авуник пай кутунай Урусатдин журналистрин Союздин Дагъустандин отделенидин кьилевайбуруз сагърай лагьана.
Агьмед Магьмудов
