2014-йисалай США-дин къаюмвилик экечIай ва миллетбазвал кьилин сиясатдиз элкъуьрай Украинадин кьилиз атайбуру са къатда Донбассдин ислягь агьалияр бомбайрин, артиллериядин, тупарин гуьллейрин харцик кутуна. Яшайишдин кIвалер, образованидин, медицинадин идараяр харапIайриз элкъуьрна. Вишералди ислягь инсанар къирмишна. Идални бес тахьана, США-дин ва кIватIал тир Западдин куьмекни галаз Россиядални гьужумиз гьазур хьана. Россиядин Президентди ва Яракьлу Къуватри абуруз ахьтин мумкинвал ганач. 2022-йисан 24-февралдиз дяведин махсус серенжемдив эгечIна.
Сифтегьан частарик кваз Донбассдин шегьерар, хуьрер хуьз ва азад ийиз фейи кьушунрик Докъузпара райондин Къалажухрин хуьряй тир 80-маркадин бронетранспортердин водитель Шагьвердиев Элшадни квай.
Элшад гзаф аялар авай зегьметкеш инсанар тир Заферанни Гуьлуьматан хизанда чIехи хьана. Элшадни Элшан кьветхверар я. Абурулай гъейри хизанда мад кьуд стхани пуд вах чIехи хьана. Диде-бубади хуьруьн майишатда зегьмет чIугваз, веледар кIвачел акьалдарна. Абуруз зегьметдин тербияни гана. Виридахъ галаз Элшадани диде-бубадиз гьар са рекьяй куьмек гана. Сала келемар битмишарна, мал-къарадиз векьер гьазурна, лапагар хвена. Школадани хъсандиз кIелна. Юлдашриз низамлувиляй, тербиядин рекьяй чешне къалурна. Акахьдай, шад, пIузаррал гьамиша хъвер алай гада тир. Гьавиляй адахъ дустарни гзаф авай.
Юкьван школа куьтягьай жегьилдиз Россиядин армиядин жергейриз эверна. Аскервилин везифаяр тирвал кьилиз акъудайдалай гуьгъуьниз Элшад Шагьвердиева оборонадин министерстводихъ галаз мадни къуллугъунин гьакъиндай икьрар кутIунна. Адан часть Ингушетияда авай. Къуллугъни тарифлудаказ кьиле физвай. 2022-йисан январдиз аскер отпускдиз багърийрин патав хъфена. Ада хизандихъ, хсуси аялрихъ, дустарихъ галаз шад йикъар акъудна. Им эхиримжи гуьруьш жеда лагьана садани фикирначир. Мад чпиз рикI алай хва, стха, буба, дуст ахквадач лагьана садани фикирнавачир.
2022-йисан 6-февралдиз Шагьвердиева къуллугъзавай часть Украинадин сергьятдин патарив рекье туна. Кьве гьафтеда аскерар чпин командирарни галаз алачухрик яшамиш хьана, абуру чуьлдин шартIара женгер чIугунин вердишвилерин тежриба тестикьар хъувуна. 24-февралдиз, командованидин махсус тапшуругъдалди, Элшадан часть Украинадин сергьятдилай элячIна, Донбассдин мулкариз гьахьна. Кьилин тапшуругъ сад тир – миллетбазрин пацукай Донбассдин шегьерар, хуьрер азад авун. Россиядин кьушунри виликди гьерекатна, чилелайни, цавайни миллетбазриз ягъунар кьуна. Женгери къалурайвал, абур вири патарихъай хъсандиз гьазур хьанвай. Чи кьушунриз виликди физ аксивалзавай, жавабдин ягъунар кьазвай. 28-февралдиз Элшадан бронетранспортердихъ душмандин ракета галукьна, яракьдин кьуркьушумдин кIус гардандиз гьахьна. ВикIегь аскер къутармиш хъийидай мумкинвални амукьнач. Ада чпелни хирер хьанвай аскеррин гъилерал чан гана. Вичин уьмуьр Ватандиз къуллугъ авуниз бахш авур 35 йисавай аскердин алакьунар гьукуматди «Жуьрэтлувиляй» орден гуналди къейдна.
Хуьре аскер уьмуьрдин юлдашди, цуькверив гекъигиз жедай хьтин кьве балади – Хадижади ва Софияди, багърийри гуьзлемишзавай. Амма 30-февралдиз агакьай къайи хабарди неинки Шагьвердиеврин тухум, гьакI вири хуьруьнвиярни, районэгьлиярни къарсатмишна. Элшад вичин мурадар кьилиз акъудиз тахьана, дуьньядилай фена. Ам Къалажухрин хуьре кучукнава. Адан тIварцIихъ школа ва диде-буба яшамиш жезвай куьче янава. Элшад Шагьвердиев хьтин викIегь хва гьамиша халкьди рикIел хуьда.
Хийир Эмиров
