1-сентябрдиз СтIал Сулейманан райондин Агъа СтIалрин хуьруьн юкьван мектебда Чирвилерин йикъаз талукьарнавай лишанлу мярекат кьиле фена. Муаллимриз ва аялриз кIелунин цIийи йис мубаракиз атанвайбурун арада муниципалитетдин администрациядин кьилин заместитель Абуталиб Фатулаев, СтIал Сулейманан райондин прокурордин куьмекчи Наида Вагьабова, “Лезги газетдин” кьилин редактор Мегьамед Ибрагьимов, меценат, мергьяматлу гзаф крарик кьил кутазвай жумарт хва Мурад Мегьамедкеримов ва масабур авай.
Сифте гаф рахай Абуталиб Фатулаева мектебдин муаллимрин коллективдиз, аялриз райондин администрациядин патай Чирвилерин югъ мубаракна. Ада къейд авурвал, чIехи шаир СтIал Сулейманан хайи хуьруь лезги халкьдиз гзаф кьадар кьегьал рухваярни рушар ганва. “Къенин несилрин векилри абурун жергеяр къалинардайдак баркаллу крар давамардайдак умуд кутазва…”, — лагьана А.Фатулаева.
Мугьманар тебрик авуналди, мектебдин директор Феликс Магьмудова мярекатдин иштиракчийриз чирвилерин сувар мубаракна, аялрихъ кIелунра агалкьунар хьун алхишна. Адан гафарай малум хьайивал, алатай йисуз мектеб акьалтIарай 19 аялдикай 10 кас кесерлу вузрик, амайбурни училищейрикни колледжрик экечIнава.
Гуьгъуьнлай рахай Мегьамед Ибрагьимова агъастIалвийриз вичин ва Мурад Мегьамедкеримован патай 1-сентябрдин сувар мубаракна. “Лезги газетдин” кьилин редакторди вичин рахунра Мурад Мегьамедкеримова хайи мектебдиз классрин руководителри чпин кIвалахда менфят къачун патал компьютерни принтер багъишнавайдакай хабар гана. Идалайни гъейри, Мурад Мегьамедкеримова цIинин йисуз Агъа СтIалрин мектебда 10-класс вири вадар аваз акьалтIарай аялриз ва и классдин руководителдиз вичин патай пулдин пишкешарни гуда.
Къейд ийин хьи, алай вахтунда чпин хайи хуьрериз жуьреба-жуьре рекьерай куьмекар гузвай жумарт рухваярни рушар тIимил авач. АгъастIалви Мурад Мегьамедкеримовни гьахьтинбурукай сад я. Ада неинки са хайи хуьруьн, гьакIни вири халкьдин умуми месэлаяр гьялуник вичин пай кутазва. Мисал яз, ада гьар йисуз 50-далай виниз хизанриз “Лезги газет” кхьизва, лезги чIалай олимпиадаяр, конкурсар тухудайла, пулдин такьатар чара ийизва, СтIал Сулейманан райондин мектебриз, “Лезги чIал чирин” ктабар маса къачуна, диде-бубадин къаюмвилик кумачир ва набут аялриз куьмекдин гъил яргъи ийизва. И сиягь мадни давамариз жеда. Къуй адан мергьяматлу крар Аллагьди кьабулрай!
Мектебдиз савкьатар гунай Феликс Магьмудова Мурад Мегьамедкеримоваз сагърай лагьана ва ада хайи мектебдиз датIана куьмекзавайди къейдна.
Агъа СтIалрин мектеб районда чIехибурукай сад я. Алай вахтунда ина 400-дав агакьна аялри чирвилер къачузва. 1-классдиз цIи 38 аял атанва. Къуй абурухъ ва виридахъ хушбахт гележег хьурай!
Агьмед Магьмудов
