Мукьвара вичин вири уьмуьр муаллимвилин баркаллу пешедиз бахш авур педагогвилин зегьметдин ветеран Паша Агьмедович Мамеева вичин 80 йисан юбилей къейдна. И лишанлу вакъиадихъ галаз алакъалу яз, чаз къе са шумуд не­силдиз чирвилерни тербия гайи муаллимдикай куьруь суьгьбет ийиз кIанзава.

ЯхцIурни цIуд йис идалай вилик, 1971-йисуз, Къурушрин хуьруьн юкьван школадиз, ДГУ-дин математикадин факультет акьалтIарна, жегьил пешекар Мамеев Паша Агьмедович хтана. Школадиз вегьей сифте камунихъ галаз Паша Агьмедовича вичин вилик шартI эцигна: аялриз тербия вуч ятIа чирун, абур зегьметдал рикI алайбур яз вердишарун, аялар садвал авай битав коллективдиз элкъуьрун, диде-бубайриз вафалубур яз тербияламишун. Зегьмет чIугвазвай йисара ам и макьсадар кьилиз акъудиз алахъна…

Алай вахтунда пенсияда аватIани,   ада жегьил несилриз насигьатар гун да­вамар­зава.

Паша муаллимдин тарсарин еридиз школаяр ахтармишиз атай республикадин образованидинни илимдин министерстводин экспертный комиссиядин членрини еке къимет ганай.

Паша муаллимдин кIвалахдихъ гьамиша хъсан нетижаяр хьана. И кардин сир квекай ибарат я лагьана хабар кьуртIа, куьрелди жаваб гуз жеда: пешедив  рикI  гваз  эгечIун,  аялар  кIан  хьун.

Хейлин йисарин тежриба авай муаллимдин тарсарни кьетIен жуьреда кьиле физвай. Мисал яз, ада тарсуна гудай тапшуругъар виликамаз, аялрин алакьунриз килигна, пуд чкадал пайна, гьазурдай: лап хъсан чирвилер авайбуруз, юкьван дережада кIелзавай­буруз ва кIелунин рекьяй гуьгъуьна амукьзавайбуруз. Нетижада аялар чпин вилик эцигнавай месэлайрин гъавурда фад гьатзавай. Гьа икI, гьар са тарсуниз дикъетдивди гьазур хьунин нетижа яз, П.Мамеева тарс гузвай аялри гьар йисуз школада, районда ва республикада кьиле тухузвай олимпиадайра иштиракзавай, хъсан чкаярни кьазвай. Математикадай ЕГЭ вахкудайла, Паша Агьмедовича тарс гайи аялар гьамиша тафаватлу жезвай, абуру еке балларни къачузвай.

Паша Агьмедовича гьисабзавайвал, аялрихъ еке агалкьунар хьун патал­ методикадин цIийи жуьреяр жагъурна, алай аямдин технический такьатрикай, компьютеррикай, интернетдикай менфят къачуна, тарсар аялар гъавурда гьатдайвал регьят къайдада теш­килна кIанда.

Ада  математикадин­ни физикадин муаллимрин методи­кадин тешкилатдин руководитель яз къад йисалайни гзаф вахтунда кIва­лахна, жегьил пешекарриз гьамиша куьмек гана.

Паша Агьмедович школадинни хайи хизандин арада тафават тун тавур кас я. Ада гайи тарсарин ери неинки школадин муаллимри, аялри, ­абурун диде-бубайри, гьакIни республикадин образованидин минис­тер­­стводин, Хасавюрт райондин админи­страциядин образованидин управ­ленидин пешекаррини къейдна.

Образованидин хиле зегьмет чIуг­ваз­вай йисара Паша муаллимди агъзурдав агакьна аялриз  чирвал гана жеди. Ада тарс гайи аялрикай къе тIвар-ван авай алимарни муаллимар, духтурарни карчияр хьанва, вирида чпиз гайи уьмуьр­динни чирвилерин тарсарай­ ­му­аллим­диз сагърай лугьузва. Паша Агьме­довичан гьакъисагъ зегьмет “Россиядин Федерациядин умуми образо­ва­нидин лайихлу работник” лагьай тIвар­цIелди, “Зегьметдин ветеран” медал­дал­ди ва гьуьрметдин са шумуд грамотадалди къейднава.

Мамеев Паша Агьмедович 1941-йисуз Докъузпара райондин Къурушрин хуьре малдардин хизанда дидедиз хьана. 1951-йисуз ам сад лагьай класс­диз фена. 1953-йисуз Хасавюрт райондиз куьч хьана ва ЦIийи Къурушдал 7-класс вири вадар аваз куьтягьна, Буйнакск шегьерда авай хуьруьн майишатдин техникумдик экечIна. Анагни агалкьунралди куьтягьай П.Мамееваз Советрин Армиядин жергейриз эверна. Ватандин вилик вичин пак тир буржи та­мамарна хтай ада хайи колхозда маларин фермадал механиквиле кIвалах­на. Спортдал рикI алай, армиядин жергейра лигим хьанвай же­гьилди вичин архайин вахт спортдиз бахшна. Адакай “Урожай” ДСО-дин чкадин отделенидин  председатель хьана, хуьре спорт вилик тухун патал футбол ва волейбол къугъвадай майданар кардик кутуна, са шумуд команда арадал гъана. Гьа йисара Къурушрин командайри неинки районда, гьакIни республикадин акъажунрани кIвен­кIвечи чкаяр кьуна. А йисара футболдай ва волейболдай акъажунар тешкилиз Къурушдал къунши хуьрерай, районрай, гьатта маса республикайрайни кваз командаяр къведай. Спорт вилик тухунай Паша Агьмедович са шумуд­ра “Урожай” ДСО-дин Центральный Советдин Грамотадиз ва хурудал ал­кIурдай знакдиз лайихлу хьанай.

…Хъсан муаллимдихъ вафалу, тербиялу хизанни ава. Уьмуьрдин юлдаш Гьабибадихъ галаз санал ада ирид аял чIехи авуна, тербияламишна. Абурухъ гьардахъ чпин хизанар хьанва.

Паша муаллимдиз юбилей мубарак авуналди, чаз адахъ чандин сагъвал  хьун кIанзава.

Гьажи  Къазиев