Алай аямдин чешнелубурукай яз машгьур хьанвай Цмуррин мектебди цIи хъсан агалкьунар къазанмишнава. СтIал Сулейманан райондин администрациядин пресс-къуллугъди хабар гайивал, образованидин жуьреба-жуьре проектар кьилиз акъудун патал алай йисуз мектебди 10 миллион манат тешкилзавай государстводин 5 грант къачунва: 3 региондин ва 2 федеральный. Абур алава образованидин жуьреба-жуьре программаяр кьилиз акъудзавай «Яратмишунрин макан. Цмур» АНО-дин бинедаллаз макьсаддив агакьарда.
Россиядин аялрин ва жегьилрин «Сифтебурун гьерекат» тешкилатдин патай къачунвай грантдихъ «Куьредин жигъиррай» проект уьмуьрдиз кечирмишдайвал я.
«Дагъви руьгь» проектдин тереф РД-дин зегьметдин ва яшайишдин рекьяй вилик финин министерстводи хвена. Проектдин сергьятра аваз адан авторри, спортдин туризмдал машгъул хьуналди, жаванриз ватандашвилинни ватанпересвилин чирвал къачудай шартIар тешкилда.
«ЭтноустIархана» проект республикадин бюджетдай пулунин такьатар чара авун патал яшайишдин проектар хкягъунин конкурсдин гъалибчи хьана. Проектдин кIвалах Кьиблепатан Дагъустандин сеняткарвилерин бинеяр чирунихъ элкъуьрда.
«Цмурдин устIаррин кIвал» (Президентдин фондунин медениятдин рекьяй конкурсдин гъалибчи) проектдин сергьятра аваз мектебди Президентдин грантрин фондунин конкурсда гъалиб хьайи «Дагъустандин сеняткарар» проектни кьилиз акъудда. Эхиримжи пуд проектда неинки Цмуррин, гьакI Кьиблепатан Дагъустандин мад 10 мектебдин ученикрини иштиракда.
Проектрин макьсад милли сеняткарвилерикай менфят къачуналди, Кьиблепатан Дагъустандин милли эйнивал чирун я. Абур кьилиз акъуддайла, «Яратмишунрин макан. Цмур» тешкилатди герек тир алатар, тадаракар авай слесаррин, харат устIаррин ва дерзичийрин цехар арадал гъида. Вири проектриз «Хуьр» фондуни куьмек гуда.
Мектебдин коллективди итижлу ва хийирлу проектар агалкьунралди кьилиз акъатуник еке умудар кутазва.
Чи мухбир
