И йикъара чав шад хабар агакьна: машгьур алим Мегьамед Гьажиеван «Урус чIаланни лезги чIалан словарь» кьвед лагьай сеферда цIийиз чапдай ахкъуд хъувунва.
Лагьана кIанда, идалай вилик и словарь «Лезги газетдин» кьилин редактор яз кIвалахай рагьметлу Агъариза Саидова акъуд хъувунай. За а чIавуз са шумуд словарь газетдин редакциядай къачунай.
Саки яхцIур йис жезва за Мегьарамдхуьруьн М.М. Гьажиеван тIварцIихъ галай 1-нумрадин мектебда дидед чIалан муаллим яз кIвалахиз. Тарсариз гьазур жедайла, гьамиша и словарь зи столдал ала.
Гьажиеврин тухумдин, Мегьарамдхуьруьн агьалийрин патай и баркаллу кIвалах кьилиз акъудай Дагъустандин халкьдин шаир Майрудин Бабахановаз, мергьяматлувилин крарал машгъул жезвай карчи Шарафудин Фатуллаеваз, гьакIни и кардик къуьн кутур вирибуруз чна рикIин сидкьидай сагърай лугьузва. Квехъ чандин сагъвални кIвалахдин рекье агалкьунар хьурай. Словарь мад сеферда чапдай ахкъудун хайи чIалал рикI алайбуруз, муаллимриз куь патай еке савкьат я.
Р.Гьажиева,
Мегьарамдхуьруьн М.М. Гьажиеван тIварцIихъ галай
1-нумрадин юкьван мектебдин дидед чIалан муаллим
