Докъузпара райондин Авадан хуьре кIелдай 400 чка авай цIийи мектебдин дарамат эцигзава. КIвалахрихъ галаз мукьувай таниш хьун патал мукьвара Авадан хуьруьз Дагъустандин Гьукуматдин Председателдин заместитель Инсаф Хайруллин мугьман хьана. Идакай муниципалитетдин администрациядин пресс-къуллугъди хабар гузва.
Адахъ галаз санал эцигунрин кIвалахар кьиле физвай гьал вахтуналди Докъузпара райондин кьилин везифаяр тамамарзавай Агьмед Агьмедова, “Главное военно-строительное управление №4” ФГУП-дин (пудратчи кархана), “АМИРУС” ЗАО-дин (субпудратчи кархана) векилри ва масабуру ахтармишна.
Къейд ийин хьи, мектебдин дарамат Урусатдин “Образование вилик тухун” госпрограммадин сергьятра аваз хкажзава.
Ахтармишзавай чIавуз Инсаф Хайруллина эцигунрин кIвалахрин еридиз кьетIен фикир гана. Гуьгъуьнлай ада объектдал кIвалахзавай устIаррихъ, фялейрихъ галаз гуьруьш кьиле тухвана ва Агьмед Агьмедовал эцигунар кьиле физвай гьал хсуси гуьзчивилик кутун, арадал къвезвай месэлаяр вахтунда гьялун тапшурмишна.
Пудратчи карханадин векилрин гафаралди, мектеб 2021-йисан июлдин вацра акьалтIардайвал я.
Лагьана кIанда, федеральный ва республикадин программайрин сергьятра аваз 2023-йисалди Дагъустанда цIийи 84 мектеб, аялрин 87 бахча, кьве мектеб патал спортдин залар эцигдайвал я.
Чи мухбир
