Бахт вич вичелай къведай затI туш. Кьве гъил хъуьчIуьк кутуна ацукьна, цавай атуй-сиве гьатуй лугьуналди жезвач. Бахтунихъ ялни авуна кIанда, яни кар-кеспида, халкьдин арада жув кутугайвал, гъвечIи-чIехи, пис-хъсан чиз тухун инсанвилин буржийрикай я.
Октябрдин 12-даз 80 йис тамам жезвай Абасов Абасмирзе Абасовича лугьузва: “Дидеди хун еке бахт я. Амма вири гьадал акъвазнавач, амайди жувалай аслу я…”
Дидеди хана, и экуь дуьньядал акъатдалди пуд варз амаз, адан буба рагьметдиз фена. Бубадин чими нефесдин кевреквал агакьначтIани, ам вичин пуд вахахъни стхадихъ галаз санал дидедин гъилерал, адан гуьгъуьна никIера, ратIарал, багълара, салара дидедин зегьметар, халкьдин гьерекат — гужар акваз чIехи хьана. Гьа и арада Германияди дяведик цIай кутуна. Аялдин бахт кьурана: са шад югъ акун хъувунач. Кьуд гъвечIи аял гуьгъуьнал алаз мукал, чанта къуьне-гъиле авай дидедин ялунар кьадарсуз тешпигь авачирбур жезва, ахварайни балайрихъ галаз рахазва.
Гьикьван четинвилер, дарвилер акунатIани, дяведин залум кашан йисаризни дурум гана, аялар чIехи хьана. Инсанрин баркаллувал, дидеди, халкьди чIугвазвай зегьметар акваз, кьатIун-зигьин артух хьана, зегьметдин къадир чир хьана. Са бубат чан кIеви хьайила, чIехибуруз жедай куьмекарни гана колхозра.
Чанда рикI-жигер авай жавандиз вичин ярар-дустарин, жегьилрин арада чIехи гьуьрмет хьана. Ам школада комсомолдин сифтегьан тешкилатдин секретарвиле хкянай, башламиш хьана бахт юзаз.
Аскервилин жергейрай хтана, пис-хъсан сирерай кьил акъудай жегьил Хасавюртдин хуьруьн майишатдин техникумдик экечIна. 1968-йисуз анаг акьалтIарай пешекар колхоздин кассирвиле тайинарна. РикI гваз, жавабдарвилелди вичин кIвалах тухузвай зигьинлу кассир 1971-йисуз “Ашагастальский” совхоздин бухгалтервиле тайинарна. Гьа икI, кIвалахда хъсан тежриба, гьакъисагъвал, халкьдин арада гьуьрмет хьайи Абасов Абасмирзедал 2003-йисуз райондин администрацияда кьилин бухгалтердин везифаяр ихтибарна.
— Зегьмет чIугуна, кIелна, зун уьзягъ я къе жуван уьмуьрдин, жемятдин, хизандин, намусдин вилик, — лугьузва зегьметдин ветеранди.
Жуьреба-жуьре къуллугърал къалурай агалкьунрай Абасов Абасмирзе Абасович В.И. Ленинан виш йисан юбилейдин медалдиз лайихлу хьана.
Исятда зегьметдин ветеран пенсияда ава. Агъа СтIалрин-Къазмайрал яшамиш жезва. ЧIехи хьанвай пуд гадани кьве руш, хтулар, птуларни ава чи юбилярдихъ. Хтулри мукьвал-мукьвал вичел кьил чIугунал шад я чIехи буба.
— Ингье зи бахт! Ибур — хтулар акурла, вири тIалар рикIелай фида! — кIубандиз лугьузва агъсакъалди.
— Абасмирзе Абасович, гьелбетда, сир туш, гьар садаз ам, бахт, вуч ятIа чириз кIан жезва. Чи акьалтзавай несилар бахтлубур яз чIехи хьун патал и кьудкъад йисан яшарин жем кьуна, квевай гьихьтин меслятар- насигьатар къалуриз жеда?
— Руьгьдин мягькемвал кIанда, къеняй къвезвай, «за икI ийида» лагьана, са кардив эгечIдай мягькемвал, иллаки алай аямда! Руьгьдиз кьериз акуртIа, цIрана, яд жеда алаш-булаш девирда.
Атана агакьнавай кьудкъад йис мубаракрай, гьуьрметлу агъсакъал! Ви уьмуьрдин юлдаш Пчеханан вилерин экв — куь бицIекар-птулар къеврагь, фад-фад чIехи хьурай, гьабур акваз, куь кIубанвал генани артух хьурай, куьн мадни еке юбилейрихъ агакьрай.
Нурудин Насруллаев
